Ўзбекистон қамоқхоналаридаги маҳкумлар ИИВ Жазони ижро этиш бош бошқармасининг нашри ҳисобланган «Вақт—Время» газетасига обуна бўлиш учун ҳеч қачон мажбурланмаган. Бу ҳақда газета бош муҳаррири Абдуҳошим Зиёвудинов маълум қилди, дея хабар бермоқда «Дарё» мухбири Мусулмонбек Иброҳимов.
Таъкидланишича, газета ҳафтада бир маротаба, 12 саҳифада, 8 минг нусхада чоп этилади. Газетанинг асосий мақсади — жазо муддатини ўтаётган шахсларни жамиятда содир бўлаётган воқеа-ҳодисалардан воқиф этиш, уларнинг ҳуқуқий онги ва маданиятини ошириш.
Газета адади аввалги йилларда 8 минг нусхадан кўп эди. Жазони ижро этиш муассасаларида маҳкумлар сони камайгани сари газета адади ҳам қисқариб бормоқда. Бу таҳририят учун йўқотиш эмас. Чунки муассис бизга моддий кўмак бериб туради.Маҳкумларнинг бари фойдали меҳнат билан банд қилинган. Уларга бажараётган ишига қараб маош тўланади. Улар ишлаб топган пулидан газетага обуна бўлиши мумкин. Бу ихтиёрий. Маҳкумлар ҳеч қачон газетага обуна бўлиш учун мажбурланмаган. Шу билан бирга, жазони ижро этиш муассасаси ходимлари ҳам газетага обуна бўлади.
Чоп этиш ҳаражатларининг асосий қисми муассис томонидан қоплангани учун «Вақт—Время» газетаси республика бўйича таннархи энг паст нашр ҳисобланади. Босмахона ва етказиб бериш харажатлари обунадан келиб тушган маблағ ҳисобидан тўланса, таҳририятдагиларнинг иш ҳақи ва бошқа харажатлар муассис томонидан қоплаб берилади.
Абдуҳошим Зиёвудинов, «Вақт—Время» газетаси бош муҳаррири
Изоҳ (0)