Bugun, 9-iyul kuni Samarqandda birinchi an’anaviy Mustaqil Davlatlar Hamdo‘stligi turistik yarmarkasi o‘z ishini boshladi. Bu haqda “Daryo” muxbiri Sevara Nishonova xabar berdi.
Tadbir O‘zbekiston Respublikasi Turizmni rivojlantirish davlat qo‘mitasi tashabbusi bilan joriy yil Samarqand shahrida tashkil etilayotgan Mustaqil Davlatlar Hamdo‘stligi Turizm kengashining navbatdagi yig‘ilishi doirasida o‘tkazilmoqda.
Ochilish marosimida Samarqand viloyati hokimi Erkinjon Turdimov, O‘zbekiston Respublikasi Turizmni rivojlantirish davlat qo‘mitasi raisi v.v.b. Abdulaziz Aqqulov va MDH ijroiya qo‘mitasining doimiy vakili Tatyana Kovaleva so‘zga chiqdi.
“Joriy yilning may oyida O‘zbekiston Respublikasi Turizmni rivojlantirish davlat qo‘mitasi tomonidan Samarqand viloyatining turizm sohasini kompleks tahlili, jumladan, Samarqandga tashrif buyurgan sayyohlar orasida ijtimoiy so‘rovnomalar o‘tkazildi. Tahlilga muvofiq, MDH davlatlaridan tashrif buyurgan sayyohlarning 70 foizi Samarqandda 2-4 kun bo‘lishni afzal ko‘rishadi, MDH mamlakatlaridan ko‘plab sayyohlar o‘z oilasi, shuningdek, guruhlar tarkibida O‘zbekistonga sayohat qilishadi. Albatta, biz bu bilan chegaralanib qolishimiz kerak emas. Biz xizmat ko‘rsatishni yaxshilash, turizm sohasidagi kadrlarni tayyorlash ustida ish olib borishimiz zarur”, – deya qayd etdi Abdulaziz Aqqulov.
Ikki kunlik tadbir dasturi Mustaqil Davlatlar Hamdo‘stligi turistik yarmarkasining ochilish marosimi va Mustaqil Davlatlar Hamdo‘stligi ishtirokchi-mamlakatlari Turizm kengashi yig‘ilishi, milliy stendlarga tashrif, yangi marshrutlar va yo‘riqnomalar taqdimoti, shuningdek, “Ipak yo‘li” Xalqaro turizm universiteti taqdimotlarini o‘z ichiga oladi.
Shuningdek, tadbir doirasida “MDH mamlakatlarida turizm va mintaqaviy hamkorlik: yangi chaqiruvlar va imkoniyatlar” Xalqaro ilmiy-amaliy seminarini ham tashkil etish rejalashtirilgan. Unda ilmiy doira vakillari ishtirok etib, turizm sohasida mintaqaviy hamkorlik masalalari muhokama etiladi, soha rivojidagi muammolar va ularni hal etish yo‘llari o‘rganiladi.
Izoh (0)