Бугун, 9 июль куни Самарқандда биринчи анъанавий Мустақил Давлатлар Ҳамдўстлиги туристик ярмаркаси ўз ишини бошлади. Бу ҳақда «Дарё» мухбири Севара Нишонова хабар берди.
Тадбир Ўзбекистон Республикаси Туризмни ривожлантириш давлат қўмитаси ташаббуси билан жорий йил Самарқанд шаҳрида ташкил этилаётган Мустақил Давлатлар Ҳамдўстлиги Туризм кенгашининг навбатдаги йиғилиши доирасида ўтказилмоқда.
Очилиш маросимида Самарқанд вилояти ҳокими Эркинжон Турдимов, Ўзбекистон Республикаси Туризмни ривожлантириш давлат қўмитаси раиси в.в.б. Абдулазиз Аққулов ва МДҲ ижроия қўмитасининг доимий вакили Татьяна Ковалева сўзга чиқди.
«Жорий йилнинг май ойида Ўзбекистон Республикаси Туризмни ривожлантириш давлат қўмитаси томонидан Самарқанд вилоятининг туризм соҳасини комплекс таҳлили, жумладан, Самарқандга ташриф буюрган сайёҳлар орасида ижтимоий сўровномалар ўтказилди. Таҳлилга мувофиқ, МДҲ давлатларидан ташриф буюрган сайёҳларнинг 70 фоизи Самарқандда 2-4 кун бўлишни афзал кўришади, МДҲ мамлакатларидан кўплаб сайёҳлар ўз оиласи, шунингдек, гуруҳлар таркибида Ўзбекистонга саёҳат қилишади. Албатта, биз бу билан чегараланиб қолишимиз керак эмас. Биз хизмат кўрсатишни яхшилаш, туризм соҳасидаги кадрларни тайёрлаш устида иш олиб боришимиз зарур», – дея қайд этди Абдулазиз Аққулов.
Икки кунлик тадбир дастури Мустақил Давлатлар Ҳамдўстлиги туристик ярмаркасининг очилиш маросими ва Мустақил Давлатлар Ҳамдўстлиги иштирокчи-мамлакатлари Туризм кенгаши йиғилиши, миллий стендларга ташриф, янги маршрутлар ва йўриқномалар тақдимоти, шунингдек, «Ипак йўли» Халқаро туризм университети тақдимотларини ўз ичига олади.
Шунингдек, тадбир доирасида «МДҲ мамлакатларида туризм ва минтақавий ҳамкорлик: янги чақирувлар ва имкониятлар» Халқаро илмий-амалий семинарини ҳам ташкил этиш режалаштирилган. Унда илмий доира вакиллари иштирок этиб, туризм соҳасида минтақавий ҳамкорлик масалалари муҳокама этилади, соҳа ривожидаги муаммолар ва уларни ҳал этиш йўллари ўрганилади.
Изоҳ (0)