Jamoatchilik fikrini o‘rganish markazi: O‘zbekistonliklarning 98,2 foizi mamlakatni butunlay tark etishni istamaydi

“Ijtimoiy fikr” Respublika jamoatchilik fikrini o‘rganish markazi O‘zbekistondagi migratsiya jarayonlarining o‘ziga xos jihatlari va sabablarini aniqlash, fuqarolarning migratsiyaga oid, jumladan, mehnat va ta’lim migratsiyasi bilan bog‘liq kayfiyatini o‘rganish, mehnat migrantlarining ijtimoy va huquqiy himoyasizlik darajasini aniqlash bo‘yicha so‘rov o‘tkazdi, deb xabar beradi O‘zA.

Ijtimoiy so‘rov natijalariga ko‘ra, o‘zbekistonliklarning aksariyat qismi (98,2 foiz) mamlakatni butunlay tark etishni istamaydi va ular o‘z kelajaklarini u bilan bog‘laydi. Respondentlarning yashash joyi, jinsi va yoshidan qat’i nazar, barcha hududlarda shu tendensiya kuzatilgan.

So‘rovnoma ishtirokchilarining 8,3 foizi boshqa mamlakatda ishlab, so‘ngra o‘z yurtiga qaytishga tayyor ekanini ko‘rsatgan. So‘rov natijalariga ko‘ra, fuqarolar ko‘pincha bir yarim yilga (31,5 foiz), yarim yilga (22,8 foiz) va 3 oyga (13 foiz) boshqa mamlakatga chiqishadi.

So‘rov aksariyat migrantlar o‘zlari yashagan joyda, o‘zlari olgan ta’lim yo‘nalishi, malakasi hamda munosib ish haqi bo‘yicha ishga joylashish imkoniyati bo‘lganda, boshqa mamlakatda ishlashdan bosh tortishga tayyor ekanini ko‘rsatdi.

So‘rov davomida mehnat migrantlarining huquq va manfaatlari buzilganda, ular qaysi organlarga murojaat qilishlari kerakligi to‘g‘risida nechog‘lik xabardor ekani aniqlandi. Zarur hollarda, aksariyat (67,8 foiz) migrantlar yordam so‘rab, diplomatik idoralar: O‘zbekiston elchixonasi yoki konsulligiga murojaat qiladi. Mazkur ko‘rsatkich so‘nggi bir necha yildan buyon barqaror, yuqori darajada turibdi.

So‘rov ishtirokchilarining yarmidan ko‘pi chet elda tahsil olayotgan oila a’zolari ta’limni davom ettirayotganliklarini ma’lum qilishgan. O‘qish yakunidan so‘ng, mamlakatga qaytgan fuqarolar soni barqaror darajada bo‘lib, so‘rov ma’lumotlariga ko‘ra, 37 foizni tashkil etadi. Farzandlari yoki boshqa yaqin qarindoshlari chet elda tahsil olayotgan yoki o‘qishni tugatgan aksariyat ishtirokchilar (88,2 foiz) oila a’zolari uyga qaytishini xohlashadi. So‘rovda ishtirok etgan har o‘ninchi ishtirokchining (11,8 foiz) pozitsiyasi shundan iboratki, bu masalani yaqin insonining o‘zi hal etishi lozim.

Bundan tashqari, so‘rov 82,4 foiz qatnashchilarning O‘zbekiston fuqarolari bo‘lmish ko‘pchilik yoshlarning ta’lim olish uchun boshqa mamlakatlarga ketib, chet el fuqaroligini olgan holda, qaytib kelmayotganliklariga nisbatan salbiy munosabatda ekanligini ham ko‘rsatdi.