Sibir o‘zbeklarning tarixiy vatani ekanini aytgan Xanti Mansi avtonom okrugi dumasi deputati Tagizade Xolid Boyukaga o‘g‘li mandatidan voz kechdi. Bu haqda uning yordamchisi Andrey Sisoyev “TASS”ga xabar berdi.
Ma’lumotga ko‘ra, bu masala yuzasidan Yugra dumasining navbatdan tashqari yig‘ilishi belgilangan. Tagizade ijtimoiy tarmoqlar orqali rasmiy bayonot berishi ham kutilmoqda. U 7-iyul kuni vakolatidan voz kechish haqidagi arizani topshirgan, yakuniy qaror esa 19-iyul kuni e’lon qilinishi mumkin.
Deputatning shov-shuvli bayonoti
29-may kuni Tagizade mintaqaviy parlament yig‘ilishida o‘zbekistonlik migrantlar “o‘zlarining tarixiy vataniga” Yugraga kelayotganini aytgandi. U bir paytlar Yugra va Tyumen viloyatining bir qismi Sibir xonligi tarkibiga kirganini qo‘shimcha qilgan. Ushbu bayonot keng jamoatchilik noroziligiga sabab bo‘lgan. Xususan, uni deputatlik vakolatidan mahrum qilish, huquq-tartibot idoralariga esa bayonotning Rossiya qonunchiligiga, jumladan, ekstremizmga mosligini tekshirish taklif etilgan.
3-iyun kuni deputat parlament ijtimoiy rivojlanish qo‘mitasi raisi o‘rinbosari lavozimidan chetlatgan. Deputatdan ommaviy ravishda uzr so‘rash talab qilingan va unga jamoat oldida tanbeh berilgan. 3-iyul kuni esa u “sifatsiz ishi” tufayli deputatlik maoshidan mahrum etilgan.
O‘z navbatida, ekspert-tilshunoslar tadqiqot davomida, prokuratura esa tekshiruvi chog‘ida qonunbuzarlik holatlarini aniqlamagan. Ular deputat nutqida ekstremizm belgilari yo‘qligini ta’kidlagan.
Tagizade Xolidning o‘zi “VKontakte” ijtimoiy tarmog‘idagi sahifasida aytgan gaplari uchun uzr so‘ragan va uning bayonoti “qat’iy da’vo emas, balki taxmin bo‘lganini” bildirgan. U Rossiya Kommunistik yoshlari ittifoqi asoschilaridan biri, 30 dan ortiq ilmiy maqola muallifi hisoblanadi. Avval maktab o‘qituvchisi, ekspert-kriminalist va Ichki ishlar vazirligi xodimi sifatida faoliyat yuritgan.
Izoh (0)