Andijonda tibbiyot buyumlarining sotib olinishi bo‘yicha tarqalgan ma’lumotlarni respublika ishchi organi tekshirmoqda. Bu haqda 5-iyul kuni jurnalistlar bilan ochiq muloqotda Moliya vazirligi Davlat xaridlari bo‘yicha boshqarma boshlig‘i o‘rinbosari Sarvar Nazarov ma’lum qildi.
Iyun oyi oxirida Andijon viloyati hokimi Shuhrat Abdurahmonov raisligida 9-iyun kuni bo‘lib o‘tgan yig‘ilishning hokim sog‘liqni saqlash tizimi vakillariga qo‘pol va haqoratli so‘zlar bilan munosabatda bo‘layotgani yozilgan audiosi internetda tarqalgan edi. Unda, jumladan, Sog‘liqni saqlash vazirligi Andijon viloyati hokimligi tender o‘tkazmay, shprits va tibbiyot qo‘lqoplarni sotib olgani holati yuzasidan bosh prokurorga murojaat qilgani haqida so‘z boradi (aynan shu holat haqida so‘z borarkan, hokim Abdurahmonov Sog‘liqni saqlash vaziri Alisher Shodmonov sha’niga noma’qul fikrlar bildirgan).
Keyinroq ushbu holat yuzasidan Sog‘liqni saqlash vazirligi bayonot berib, “pul mablag‘larining noto‘g‘ri taqsimlanishi va davlat xaridlarini amalga oshirish tartibi buzilishi oqibatida” Andijon viloyati aholisining dori vositalariga bo‘lgan ehtiyoji 44,5 foizga ta’minlangan bir paytda, qo‘lqop 265 foizga, infuzion sistema 103 foizga hamda shprits 500 foizga ehtiyojdan ortiq xarid qilinganini ma’lum qilgan. Vazirlik sotib olingan tibbiyot buyumlari orasida sertifikati bo‘lmagan sifatsiz mahsulotlar borligini qayd etib o‘tgan edi. Shundan so‘ng bunga Andijon viloyati hokimligi ham munosabat bildirdi.
Hukumatning moliya-iqtisodiyot sohasi mas’ullarining 5-iyul kuni jurnalistlar bilan bo‘lib o‘tgan ochiq muloqotida “Daryo” muxbiri Musulmonbek Ibrohimov Andijon viloyatida tibbiyot buyumlarining viloyat hokimligi ko‘rsatmasiga asosan, tender o‘tkazmay sotib olish qonuchilikka qay darajada to‘g‘ri kelishi haqida savol berdi. Savolga javob berarkan, Moliya vazirligining Davlat xaridlari bo‘yicha boshqarma boshlig‘i o‘rinbosari Sarvar Nazarov tibbiyot buyumlarini hokimlik emas, balki budjet buyurtmachilari sotib olganini ta’kidladi.
“Tibbiyot buyumlarini hokimlik emas, davlat buyurtmachilari, ya’ni hokimlik tasarrufida bo‘lgan tashkilotlar o‘z ehtiyojlaridan kelib chiqib, davlat xaridlari orqali sotib oladi. Buning uchun hududda xarid komissiya tashkil etilgan. Komissiya kelib tushgan takliflarni o‘rganib chiqib, kimdan sotib olish kerakligi bo‘yicha qaror chiqaradi. Qarorda birinchi navbatda narx, ikkinchi navbatda esa sifat ko‘rsatgichi qayd etiladi”, — dedi Sarvar Nazarov.
Moliya vazirligi vakilining qo‘shimcha qilishicha, ushbu masala yuzasidan tuzilgan ishchi organ hozirda tekshiruv olib bormoqda: “Andijonda tibbiyot buyumlarini sotib olinishi bo‘yicha tarqalgan ma’lumotlarni respublika ishchi organi tekshirmoqda. Ishchi organ tarkibi Moliya, Sog‘liqni saqlash vazirligi va prokratura organlari vakillaridan iborat. Ishchi organ o‘z ishini yakunlagach, natijasi bo‘yicha OAVga qo‘shimcha ma’lumot beriladi”, — dedi u.
Izoh (0)