«Ижтимоий фикр» Республика жамоатчилик фикрини ўрганиш маркази Ўзбекистондаги миграция жараёнларининг ўзига хос жиҳатлари ва сабабларини аниқлаш, фуқароларнинг миграцияга оид, жумладан, меҳнат ва таълим миграцияси билан боғлиқ кайфиятини ўрганиш, меҳнат мигрантларининг ижтимой ва ҳуқуқий ҳимоясизлик даражасини аниқлаш бўйича сўров ўтказди, деб хабар беради ЎзА.
Ижтимоий сўров натижаларига кўра, ўзбекистонликларнинг аксарият қисми (98,2 фоиз) мамлакатни бутунлай тарк этишни истамайди ва улар ўз келажакларини у билан боғлайди. Респондентларнинг яшаш жойи, жинси ва ёшидан қатъи назар, барча ҳудудларда шу тенденция кузатилган.
Сўровнома иштирокчиларининг 8,3 фоизи бошқа мамлакатда ишлаб, сўнгра ўз юртига қайтишга тайёр эканини кўрсатган. Сўров натижаларига кўра, фуқаролар кўпинча бир ярим йилга (31,5 фоиз), ярим йилга (22,8 фоиз) ва 3 ойга (13 фоиз) бошқа мамлакатга чиқишади.
Сўров аксарият мигрантлар ўзлари яшаган жойда, ўзлари олган таълим йўналиши, малакаси ҳамда муносиб иш ҳақи бўйича ишга жойлашиш имконияти бўлганда, бошқа мамлакатда ишлашдан бош тортишга тайёр эканини кўрсатди.
Сўров давомида меҳнат мигрантларининг ҳуқуқ ва манфаатлари бузилганда, улар қайси органларга мурожаат қилишлари кераклиги тўғрисида нечоғлик хабардор экани аниқланди. Зарур ҳолларда, аксарият (67,8 фоиз) мигрантлар ёрдам сўраб, дипломатик идоралар: Ўзбекистон элчихонаси ёки консуллигига мурожаат қилади. Мазкур кўрсаткич сўнгги бир неча йилдан буён барқарор, юқори даражада турибди.
Сўров иштирокчиларининг ярмидан кўпи чет элда таҳсил олаётган оила аъзолари таълимни давом эттираётганликларини маълум қилишган. Ўқиш якунидан сўнг, мамлакатга қайтган фуқаролар сони барқарор даражада бўлиб, сўров маълумотларига кўра, 37 фоизни ташкил этади. Фарзандлари ёки бошқа яқин қариндошлари чет элда таҳсил олаётган ёки ўқишни тугатган аксарият иштирокчилар (88,2 фоиз) оила аъзолари уйга қайтишини хоҳлашади. Сўровда иштирок этган ҳар ўнинчи иштирокчининг (11,8 фоиз) позицияси шундан иборатки, бу масалани яқин инсонининг ўзи ҳал этиши лозим.
Бундан ташқари, сўров 82,4 фоиз қатнашчиларнинг Ўзбекистон фуқаролари бўлмиш кўпчилик ёшларнинг таълим олиш учун бошқа мамлакатларга кетиб, чет эл фуқаролигини олган ҳолда, қайтиб келмаётганликларига нисбатан салбий муносабатда эканлигини ҳам кўрсатди.
Изоҳ (0)