O‘zbekistonda taqiqlangan tashkilotlarga a’zoligi uchun qidiruvda bo‘lgan ikki shaxs Afg‘onistonda ushlangan. Bu haqda Buxoro viloyati IIB matbuot xizmati rahbari Quvvat Yarashev “Daryo”ga ma’lum qildi.
Buxoro shahridagi “Shirbudin” ko‘chasida yashovchi, 1992-yilda tug‘ilgan N.M. hamda Vobkent tumani, Xalach qishlog‘ida ro‘yxatda turuvchi, 1982-yilda tug‘ilgan B.Sh.lar Buxoro viloyati IIB Tergov boshqarmasi tomonidan qidiruvda bo‘lgan.
Ular tomonidan O‘zbekiston Respublikasi JKning 244-1-moddasi (jamoat xavfsizligi va jamoat tartibiga tahdid soladigan materiallarni tayyorlash, saqlash, tarqatish yoki namoyish etish), 244-2-moddasi (Diniy ekstremistik, separatistik, fundamentalistik yoki boshqa ta’qiqlangan tashkilotlar tuzish, ularga rahbarlik qilish hamda ishtirok etish), 244-3-moddasi (diniy mazmundagi materiallarni qonunga xilof ravishda tayyorlash, saqlash, olib kirish yoki tarqatish) va 159-moddasi (O‘zbekiston Respublikasining konstitutsiyaviy tuzumiga tajovuz qilish) 3-qismida ko‘rsatilgan jinoyatlar sodir qilingan.
Bu ikki shaxs Afg‘onistondan ekstraditsiya qilingan va tergov hibsxonasiga joylashtirilgan.
Izoh (0)