Boku shahrida UNESCO Butunjahon merosi qo‘mitasi 43-sessiyasining tantanali ochilish marosimi bo‘lib o‘tdi. Bu haqda Turizmni rvojlantirish qo‘mitasi matbuot xizmati xabar berdi.
Unda Ozarbayjonning birinchi vitse-prezidenti, UNESCO ko‘ngilli elchisi Mehribon Aliyeva ishtirok etdi.
Shuningdek, UNESCO bosh direktori Odre Azule, Tashkilotning Ijro kengashi raisi Li Ben Xyon va Ozarbayjon Respublikasi madaniyat vaziri Abulfas Garayevlar ham so‘zga chiqdi.
Butunjahon merosi qo‘mitasi 43-sessiyasida O‘zbekistondan UNESCO ishlari bo‘yicha Milliy komissiya raisi, bosh vazir o‘rinbosari Aziz Abduhakimov boshchiligidagi delegatsiya ishtirok etmoqda.
Ta’kidlash joizki, Butunjahon merosi qo‘mitasining 43-sessiyasida dunyoning 180 dan ortiq mamlakatidan 2500 dan ziyod kishi - vazirlar, UNESCO elchilari, tegishli tashkilotlarning bosh direktorlari, xalqaro tuzilmalarning Ozarbayjondagi elchilari va mamlakat hukumati a’zolari qatnashmoqda.
Qo‘mitaning Bokudagi sessiyasida UNESCO ro‘yxatiga kiritish uchun 42 arizadan 36 taqdimot ko‘rib chiqiladi.
Bulardan 6 taklif - tabiiy merosga, 28 tasi - madaniy merosga va 2 tasi aralash (tabiiy va madaniy) merosga taalluqli. Ikki kunlik sessiya doirasida Aziz Abduhakimov boshchiligidagi O‘zbekiston delegatsiyasi vakillari UNESCO bosh direktori Odre Ozule, Ozarboyjon bosh vazir o‘rinbosari D.Ahmedov, madaniyat vaziri A.Garayev, ta’lim vaziri D.Bayramov, Turizmni rivojlantirish davlat agentligi raisi F.Nagiyev, UNESCO Butunjahon merosi markazi direktori M.Ryossler hamda Butunjahon merosi qo‘mitasiga a’zo 21 mamlakat delegatsiyalari rahbarlari bilan uchrashuvlar o‘tkazishi rejalashtirilgan.
Bugungi kunda O‘zbekiston va UNESCO o‘rtasida ko‘p bosqichli va samarali hamkorlik amalga oshirilmoqda. Xususan, o‘tgan yilning oktyabrida Prezident Shavkat Mirziyoyevning UNESCO shtab-kvartirasiga tashrifi davomida imzolangan “Mamlakatlar dasturi” doirasida madaniyat, ta’lim, ilm-fan va AKT rivoji kabi yo‘nalishlarga oid muhim loyihalar amalga oshirilmoqda.
Tomonlar o‘rtasida O‘zbekistonning moddiy va nomoddiy madaniy merosini asrash masalalari bo‘yicha yo‘lga qo‘yilgan konstruktiv muloqotni alohida ta’kidlash joiz, bu respublika tomonidan ratifikatsiya qilingan barcha normalar hamda UNESCO’ning ushbu yo‘nalishdagi tavsiyalarini to‘liq ta’minlash imkonini beradi. Bundan tashqari, Aziz Abduhakimov “Ipak yo‘li” Xalqaro turizm universiteti rektori sifatida Ozarbayjon turizm va menejment universiteti bilan ta’lim va ilm-fan bo‘yicha Anglashuv memorandumini imzolashi kutilmoqda.
Izoh (0)