Kaliforniyalik erkak sobiq ishxonasiga bostirib kirib, o‘zini ishdan bo‘shatgan direktorni otib tashladi

Kaliforniya shtatida joylashgan Ford avtosalonidagi ishidan ayrilgan erkak kompaniya binosida otishma uyushtirdi, deb xabar beradi Forum Daily.

Ko‘ngilsiz hodisa oqibatida salonning ikki nafar xodimi va otishma uyushtirgan erkak halok bo‘lgan.

Morgan-Xill politsiya boshqarmasi tomonidan e’lon qilingan bayonotda yozilishicha, avtosalonning ikki nafar xodimi o‘qotar quroldan jiddiy jarohat olib, voqea joyida vafot etgan.

Jinoyat sodir etgan shaxs esa o‘zini o‘zi otib o‘ldirgan. Hozirda tergov harakatlari olib borilmoqda.

Salonning ehtiyot qismlar bo‘limida ishlovchi Dag Makglashanning aytishicha, mergan kompaniyaning sobiq xodimi bo‘lgan.

“Ehtiyot qismlar va ta’mirlash bo‘limining direktori mutaxassislarimizdan birini ishdan bo‘shatib yubordi. Taxminimcha, u ko‘chaga chiqib, pistolet olib kelgan va bo‘lim direktorining ofisiga kirib, uni otib tashlagan”, — deydi Makglashan.

Shuningdek, uning qo‘shimcha qilishicha, erkak ehtiyot qismlar bo‘limining menedjerini ham o‘ldirgan.