Andijonlik 1392 nafar yigit-qiz 2018–2019 o‘quv yilida umumta’lim maktablarining 11-sinfini oltin va kumush medallari bilan tamomlagan. Natijada viloyat ushbu ko‘rsatkich bo‘yicha respublikada birinchi o‘rinni egallagan. Bu haqda viloyat xalq ta’limi boshqarmasiga tayanib “Daryo” muxbiri xabar bermoqda.
Andijon shahridagi “Barkamol avlod” bolalar ijodiyoti markazida umumta’lim maktablarini a’lo bahoga tamomlagan bitiruvchilarga medallarni topshirish marosimi o‘tkazildi.
Viloyat xalq ta’limi boshqarmasi boshlig‘i Furqat Buzrukovning aytishicha, o‘tgan o‘quv yilida viloyatdagi umumta’lim maktablarining 11-sinfini 30 ming 402 nafar yigit-qiz muvaffaqiyatli tugatib, mustaqil hayotga yo‘llanma olgan. Ularning 736 nafari oltin va 656 nafari kumush medalga sazovor bo‘lgan.
— Joriy yilda maktabimizni 36 nafar o‘quvchi tamomladi, — deydi Andijon tumanidagi 36-sonli davlat ixtisoslashtirilgan maktab internati bitiruvchisi, oltin medal sohibi Javohir Tohirov. – Shundan 8 nafari oltin va yana 8 nafari kumush medaliga sazovor bo‘ldi.
Tadbir davomida joriy yilning 6—11-iyun kunlari Toshkent shahrida umumta’lim fanlari bo‘yicha 11-sinf o‘quvchilari o‘rtasida bo‘lib o‘tgan Respublika fan olimpiadasining yakuniy bosqichida yuqori natijalarni qayd etgan o‘quvchilar ham viloyat hokimligi va xalq ta’limi boshqarmasining faxriy yorliqlari hamda esdalik sovg‘alari bilan taqdirlandi.
Shuningdek, “Yilning eng yaxshi fan o‘qituvchisi” Respublika tanlovining viloyat bosqichida birinchi o‘rinni egallab, tanlovning respublika bosqichiga yo‘llanma olgan g‘oliblarga tashkilotchilar tomonidan sovg‘alar topshirildi.
Izoh (0)