Fuqarolik ishlari bo‘yicha Farg‘ona tumanlararo sudining 2018-yildagi ijro varaqasiga asosan Farg‘ona shahrida yashovchi A.Jo‘rayevdan Qirg‘izistonning O‘sh viloyatida yashovchi M.Abidova foydasiga 88,4 million so‘m qarz undirish belgilangan. Bu haqda O‘zA xabar berdi.
Mazkur holat yuzasidan Majburiy ijro byurosi Farg‘ona shahar bo‘limi tomonidan ijro ishi yurituvi qo‘zg‘atilgan va sud qarori ijrosini ta’minlash bo‘yicha qarzdorga 15 kunlik ixtiyoriy muddat berilgan.
Biroq, A.Jo‘rayev M.Abidovaga 88,4 mln. so‘m qarzini osonlikcha berib qo‘ymasdan davlat ijrochisining chaqiruvlariga javob bermagan va doim chap berishga harakat qilib kelgan.
Majburiy ijro harakatlari davomida qarzdorning yashash manzilidan ehtiyojidan ortiqcha mulk aniqlanmagan, nomiga rasmiylashtirilgan ko‘chmas mulk va banklarda pul mablag‘lari mavjud bo‘lmasa-da, unga tegishli Cobalt rusumli avtomashinasi borligi aniqlangan.
Avtomobilga nisbatan tegishli idoralarga taqiqlar qo‘yildi, lekin qarzdor ha deganda mashinani davlat ijrochisiga berib qo‘ymadi, anchagacha yashirib yurdi. MIB shahar bo‘limi va shahar YXHB xodimlari o‘zaro hamkorlikda o‘tkazilgan reyd natijasida A.Jo‘rayev ushbu mashinani boshqarib yurgan vaqtda ushlangan va avtomobil belgilangan tartibda hujjatlar rasmiylashtirgan holda xatlanib, jarima maydonchasiga kiritilgan.
Davlat ijrochisi tomonidan avtomobil baholanib, ochiq onlayn savdolariga kiritilgan. Shundagina qarzdor mashinadan ayrilib qolishdan cho‘chib, M.Abidovani yetaklab MIB shahar bo‘limiga kirib keldi va shu yerning o‘zida unga 87 million so‘m qolgan qarzdorlikni to‘liq sanab topshirdi.
Izoh (0)