Toshkent shahar bodibilding va fitnes federatsiyasi prezidenti Habibulla Nizomov “Daryo” internet-nashri uchun eksklyuziv intervyu berdi.
Habibulla Nizomov suhbat davomida sport ozuqasi bo‘lgan protein, uning foydali va zararli oqibatlari haqida gapirib berdi.
Protein bu – oqsil. U hech qanday dori vositasi emas. Oqsil biz iste’mol qilayotgan barcha ovqatimizda bor. U inson organizmi uchun juda kerakli narsa. Oqsil sut zardobidan olinadi. “Protein ichib shishib ketdi”, “Proteinsiz shug‘ullanyapman” degan gaplarni gapirishadi. Proteinsiz mashg‘ulot qilish uchun go‘sht, tuxum va sutli mahsulotlarni yemaslik kerak. Proteinsiz bo‘lmaydi. Bizda ishlab chiqarilayotgan yoki chetdan kirib kelayotgan proteinlar sut zardobidan tayyorlanadi. “Poroshok” shakliga keltirilgan bo‘ladi, undan maksimal darajada uglevod va yog‘lar olib tashlanib, oqsilning o‘zi qoldiriladi. Sportchi mashg‘ulotdan keyin u narsani ichsa, tez tiklanadi. Protein shuning uchun o‘ylab topilgan narsa. Uning hech qanday salbiy tomonlari yo‘q.O‘zimiz ham proteinlar ishlab chiqaramiz. Ko‘pchilik “Protein ichgandim, menga zarar qildi” deb aytadi. Xalq ichida bepushtlikka olib keladi kabi gaplar yuradi. Buning umuman aloqasi yo‘q. Hattoki bolalar ozuqasi ham proteindan qilinadi. Shuning uchun ham uning hech qanaqa ziyoni yo‘q. Ishonchli va toza protein bo‘lsa, bemalol iste’mol qilish mumkin. Oddiy inson yo‘qotadigan kaloriyani sportchi sport zalda bir soatda yo‘qotadi. Barcha energiyasini sarflab bo‘lgach, qayta o‘ziga kelishi uchun albatta, protein iste’mol qilishi kerak. Agar protein iste’mol qilmasa uning mashg‘uloti samarasiz bo‘ladi. Proteinni shug‘ullanmasdan iste’mol qilsa, hech qanday foydasi yo‘q. Agarda shug‘ullanib ichadigan bo‘lsa, chiroyli qomatga ega bo‘lish mumkin.
Habibulla Nizomov, Toshkent shahar bodibilding va fitnes federatsiyasi prezidenti
Izoh (0)