Bandlik va mehnat munosabatlari vaziri Sherzod Kudbiyev 18-iyun kuni Axborot va ommaviy kommunikatsiyalar agentligida jurnalistlar bilan bo‘lib o‘tgan muloqotda Andijondagi ko‘zbo‘yamachilikni mehnat inspeksiyasi o‘rganishini aytib o‘tdi. Bu haqda “Daryo” muxbiri Musulmonbek Ibrohimov xabar bermoqda.
Eslatib o‘tamiz, Andijon shahrida ijtiomiy himoyaga muhtoj bir necha ayollarga kottej berish sharti bilan “Mustaqillik tikuvchilik majmuasi”ga ishga qabul qilingani, 2019-yilning fevral—mart oylarida viloyat hokimligi mas’uli korxonaning uy-joyga muhtoj olti nafar ishchisiga yangi qurilayotgan kottejlardan sovg‘a sifatida bittadan berilishini ma’lum qilgani, ularning bepul kottej olgani to‘g‘risida “O‘zbekiston 24” telekanalida lavha ham efirga uzatilgani haqida avval xabar berilgan edi.
Prezident Shavkat Mirziyoyevning Andijonga tashrifi vaqtida ishchilardan faqat bir nafariga kottej sovg‘a qilingan. Tashrifdan so‘ng viloyat hokimligi mas’uli talabiga ko‘ra, qolgan besh nafar ishchi yangi qurilayotgan to‘rt qavatli uylardan xonadon ajratish va’da qilingan holda kottejlardan ko‘chirilgan. Bosh prokuratura ma’lumotlariga ko‘ra, viloyat hokimligi mutasaddilari besh nafar ayolga kottej berilishini va’da qilib, ulardan bu haqda OAVga intervyular olinishiga erishib, kottejlarga ularni uy egasi sifatida kiritib qo‘yib, biroq yakunda ularga kottej ajratmasdan, ko‘zbo‘yamachilikka yo‘l qo‘ygan.
Tikuv sexi xodimlari Shohista Bakirova va Muyassar Rahimova “Daryo”ga bergan intervyusida “Mustaqillik tikuvchilik majmuasi” hamda ular o‘rtasida hech qanday shartnoma imzolanmagani, mehnatga qay tartibda haq to‘lanishi, uy uchun qaysi bitimga ko‘ra pul o‘tkazilayotgani aytilmaganini ma’lum qilgan edi. Ularning ma’lum qilishicha, sexda xodimlar ba’zan 15—16 soatlab, shanba va yakshanba kunlari ham ishlatilgan. Chang-to‘zonga qaramay, ayrim ayollar emizikli bolasi bilan kelib, ishlagan. Xususan, Shohista Bakirova va Muyassar Rahimova sakkiz oy maosh olmay ishlagan, ba’zan farzandlarini ham olib kelib ishlatgan.
18-iyun kuni bandlik va mehnat munosabatlari vaziri Sherzod Kudbiyev ishtirokida bo‘lib o‘tgan ochiq muloqotda, jurnalistlar nima uchun “Mustaqillik tikuvchilik majmuasi” korxonasida mehnat qonunchiligi buzilishi holatlari mavjudligi yuzasidan vazirlik biror izoh bermaganligiga qiziqdi. Vazir Kudbiyev Andijondagi ko‘zbo‘yamachilik holatida mehnat qonunchiligi buzilishi holatlaridan bexabarligini bildirib, ushbu masala mehnat ispeksiyasi tomonidan o‘rganib chiqilishini ta’kidladi.
“Buni o‘rganib chiqib, rasmiy javob beramiz. Bugungi maxsus buyrug‘imga asosan, Mehnat inspeksiyasining Andijonga bog‘liq bo‘lmagan inspektorlaridan iborat guruhi tuzilib, o‘sha korxonadagi mehnat sharoiti o‘rganiladi”, — dedi vazir Kudbiyev. Jurnalistning Andijondagi holat bo‘yicha materiallar OAVda e’lon qilinganiga ikki haftadan o‘tgani va vaziyatni o‘rganish uchun yetarlicha vaqt bo‘lgani haqidagi ta’kidiga vazir izoh bermadi.
Izoh (0)