Бандлик ва меҳнат муносабатлари вазири Шерзод Кудбиев 18 июнь куни Ахборот ва оммавий коммуникациялар агентлигида журналистлар билан бўлиб ўтган мулоқотда Андижондаги кўзбўямачиликни меҳнат инспекцияси ўрганишини айтиб ўтди. Бу ҳақда «Дарё» мухбири Мусулмонбек Иброҳимов хабар бермоқда.
Эслатиб ўтамиз, Андижон шаҳрида ижтиомий ҳимояга муҳтож бир неча аёлларга коттеж бериш шарти билан «Мустақиллик тикувчилик мажмуаси»га ишга қабул қилингани, 2019 йилнинг февраль—март ойларида вилоят ҳокимлиги масъули корхонанинг уй-жойга муҳтож олти нафар ишчисига янги қурилаётган коттежлардан совға сифатида биттадан берилишини маълум қилгани, уларнинг бепул коттеж олгани тўғрисида «Ўзбекистон 24» телеканалида лавҳа ҳам эфирга узатилгани ҳақида аввал хабар берилган эди.
Президент Шавкат Мирзиёевнинг Андижонга ташрифи вақтида ишчилардан фақат бир нафарига коттеж совға қилинган. Ташрифдан сўнг вилоят ҳокимлиги масъули талабига кўра, қолган беш нафар ишчи янги қурилаётган тўрт қаватли уйлардан хонадон ажратиш ваъда қилинган ҳолда коттежлардан кўчирилган. Бош прокуратура маълумотларига кўра, вилоят ҳокимлиги мутасаддилари беш нафар аёлга коттеж берилишини ваъда қилиб, улардан бу ҳақда ОАВга интервьюлар олинишига эришиб, коттежларга уларни уй эгаси сифатида киритиб қўйиб, бироқ якунда уларга коттеж ажратмасдан, кўзбўямачиликка йўл қўйган.
Тикув цехи ходимлари Шоҳиста Бакирова ва Муяссар Раҳимова «Дарё»га берган интервьюсида «Мустақиллик тикувчилик мажмуаси» ҳамда улар ўртасида ҳеч қандай шартнома имзоланмагани, меҳнатга қай тартибда ҳақ тўланиши, уй учун қайси битимга кўра пул ўтказилаётгани айтилмаганини маълум қилган эди. Уларнинг маълум қилишича, цехда ходимлар баъзан 15—16 соатлаб, шанба ва якшанба кунлари ҳам ишлатилган. Чанг-тўзонга қарамай, айрим аёллар эмизикли боласи билан келиб, ишлаган. Хусусан, Шоҳиста Бакирова ва Муяссар Раҳимова саккиз ой маош олмай ишлаган, баъзан фарзандларини ҳам олиб келиб ишлатган.
18 июнь куни бандлик ва меҳнат муносабатлари вазири Шерзод Кудбиев иштирокида бўлиб ўтган очиқ мулоқотда, журналистлар нима учун «Мустақиллик тикувчилик мажмуаси» корхонасида меҳнат қонунчилиги бузилиши ҳолатлари мавжудлиги юзасидан вазирлик бирор изоҳ бермаганлигига қизиқди. Вазир Кудбиев Андижондаги кўзбўямачилик ҳолатида меҳнат қонунчилиги бузилиши ҳолатларидан бехабарлигини билдириб, ушбу масала меҳнат испексияси томонидан ўрганиб чиқилишини таъкидлади.
«Буни ўрганиб чиқиб, расмий жавоб берамиз. Бугунги махсус буйруғимга асосан, Меҳнат инспекциясининг Андижонга боғлиқ бўлмаган инспекторларидан иборат гуруҳи тузилиб, ўша корхонадаги меҳнат шароити ўрганилади», — деди вазир Кудбиев. Журналистнинг Андижондаги ҳолат бўйича материаллар ОАВда эълон қилинганига икки ҳафтадан ўтгани ва вазиятни ўрганиш учун етарлича вақт бўлгани ҳақидаги таъкидига вазир изоҳ бермади.
Изоҳ (0)