O‘zbekiston TIVning xabar berishicha, 9-aprel kuni O‘zbekistonning Vladivostok shahridagi Bosh konsulxonasiga mamlakat fuqarosi Xabibullo O‘rinboyev murojaat qilib Andijon viloyati Qo‘rg‘ontepa tumanidan bo‘lgan ukasi G‘olibjonning vafot etganini ma’lum qilgan hamda uning jasadini vatanga yuborishda yordam so‘ragan.
Qayd etilishicha, kasallik tufayli olamdan o‘tgan O‘zbekiston fuqarosi 2018-yilning mart oyidan buyon Primorye o‘lkasida qonuniy ravishda yashagan va ishchi sifatida turli faoliyatlar bilan shug‘ullangan.
Xorijda mehnat faoliyatini amalga oshiruvchi shaxslarni qo‘llab-quvvatlash hamda ularning huquq va manfaatlarini himoya qilish jamg‘armasi hisobidan transport xarajatlarining bir qismini qoplashda ko‘mak berish masalasini muhokama qilish uchun Konsulxona Tashqi mehnat migratsiyasi agentligining Rossiyadagi vakolatxonasi bilan bog‘langan.
Zarur hujjatlar rasmiylashtirilganidan so‘ng, Jamg‘arma yordamida marhumning jasadini akasi Vladisvotok—Novosibirsk—Farg‘ona yo‘nalishida O‘zbekistonga olib ketgan.
“Agarda O‘zbekiston fuqarosi bo‘lgan yaqin qarindoshingiz yoki tanishingiz chet elda yordamga muhtojligi to‘g‘risida ma’lumotga ega bo‘lsangiz, Tashqi mehnat migratsiyasi agentligiga yoki uning Rossiya Federatsiyasidagi vakolatxonasiga murojaat qilishingiz tavsiya etiladi”, — deb eslatma bergan Konsullik-huquqiy departamenti.
Ma’lumot uchun:
Rossiya Federatsiyasidagi manzil: Moskva shahri, 1-Kazachiy tor ko‘chasi, 11/2 (1-y Kazachiy pereulok 11/2).
Murojaat uchun telefon raqami: +7-903-507-76-67.
O‘zbekiston Respublikasida manzil: Toshkent shahri Olmazor tumani, Qamarniso ko‘chasi, 1-uy.
Murojaat uchun telefon raqami: +998-71-202-33-55 (ichki raqam: 24, 30).
Izoh (0)