O‘zbekiston Fanlar Akademiyasi huzuridagi O‘simliklar kimyosi institutida “GMP talablari bo‘yicha dori vositalari substansiyalarini ishlab chiqarish texnologiyalarini sinash ilmiy-texnologik markaz” tashkil etildi. Bu haqda “Daryo” muxbiri xabar bermoqda.
“Yangi ish boshlagan markaz avvalgi eskicha ish jarayonidan tubdan farq qiladi. Avvlambor, dori vositasini ishlab chiqarish tayyor mahsulotga xodim-personallardan va havodan tushishi mumkin bo‘lgan turli yot moddalar va mikroorganizmlardan himoyalangan. Ishlatiladigan oddiy suv ham GMP talablari bo‘yicha zamonaviy filtrlar orqali tozalanadi”, — deydi O‘simlik moddalari kimyosi instituti yetakchi ilmiy xodimi, texnika fanlari doktori Ravshanjon Halilov.
MDH davlatlari orasida yagona deb e’tirof etilayotgan markaz 25 xil substansiya va shuncha quriq ekstrakatlar ishlab chiqarish imkoniyatiga ega. Shuningdek, markaz farmatsevtik korxonalar xodimlarining malaka oshirish hamda GMP sharoitlarida ishlay oladigan kadrlarni tayyorlash vazifasini ham bajaradi.
Institutning ilmiy xodimi Baxtiyor Abdurahmonovning ta’kidlashicha, GMP talablari asosida ishlab chiqarish yo‘lga qo‘yilmas ekan, dori vositalari yoki biologik qo‘shimchalarni jahon bozoriga olib chiqish dargumon. Masalan, yurtimizda faoliyat yurituvchi yirik farmatsevtik firmalardan biri institut tomonidan olingan sitizin moddasi asosida yangi dori vositasini joriy etgan. Ammo mazkur dori vositasini eksport qilish uchun ishlab chiqaruvchida GMP talablari asosidagi ilmiy markaz yo‘qligi to‘sqinlik qilayotgan edi. Rossiyaga eksport qilinadigan substansiyalarda ham shu holat. Endilikda markaz bu kabi muammolarga yechim bo‘ladi.
Markazning to‘liq ishga tushishi ishlab chiqarish quvvatini 5 barobarga, eksport hajmini esa 5 million AQSh dollarga oshirish imkonini beradi.
Ma’lumot uchun, jahonda farmatsevtika sohasi uchun GMP talablari qabul qilingan bo‘lib, u o‘z ichiga bir qator yo‘nalishlarni qamrab oladi: birinchidan, ishni to‘g‘ri tashkillashtirish; ikkinchidan, texnologik jarayonda ishtirok etayotgan ishchi xodimlarni-personallarni ma’lum yo‘riqnomadan o‘tganligi va har bir holatga javob beradigan holda yo‘naltirish; uchinchidan, dori vositalarini ishlab chiqarishda ruxsat berilgan jihozlarni o‘rnatish; to‘rtinchidan, ishlab chiqarish jarayonini toza hududda amalga oshirishdan iborat.
Izoh (0)