Islom dunyosining mashhur olimi, muftiy Muhammad Taqiy Usmoniy O‘zbekistonga keldi. Bu haqda “Islom.uz” xabar bermoqda.
Shayxulislom Moskva tashrifidan so‘ng to‘g‘ri Buxoroga yo‘l oldi. U Buxoro aeroportida hurmat va ehtirom ila kutib olindi.
Mehmon tungi Buxoroi sharifning diqqatga sazovor joylari, xususan, Eski shahar, qadim madrasalar va masjidlar, Mir Arab madrasasini tomosha qildi.
Xufton namozi Masjidi Kalonda Muhammad Taqiy Usmoniy ishtirokida ado etildi. Shu asnoda mehmonning birinchi kungi ziyoratlari o‘z nihoyasiga yetdi.
Ma’lumot uchun, Muhammad Taqiy Usmoniy 1943-yilda Hindistonda tug‘ilgan, silsilasi Usmon ibn Affonga borib taqaladi. Pokistonning Karachi shahridagi Islom universiteti prorektor bo‘lib ishlab kelmoqda. Dunyoning eng nufuzli 500 musulmoni ro‘yxatiga kiritilgan.
Eslatib o‘tamiz, joriy yil 22-mart kuni Karachida Muhammad Taqiy Usmoniyga suiqasd uyushtirilgani, uning ikki tansoqchisi halok bo‘lib, o‘zi va nabirasi omon qolgani haqida xabar berilgandi.
Izoh (0)