Shavkat Mirziyoyev va Qosim-Jo‘mart To‘qayev muzokaralarni kengaytirilgan tarkibda davom ettirdi. Unda ikki mamlakat vazirliklari va yirik kompaniyalari rahbarlaridan iborat delegatsiyalar a’zolari ishtirok etdi. Bu haqda Prezident matbuot xizmati ma’lum qildi.
Tomonlar 2018—2019-yillarga mo‘ljallangan ikki davlat o‘rtasidagi Iqtisodiy hamkorlik strategiyasining izchil amalga oshirilishi mamlakatlar strategik maqsadlarining mushtarakligiga asoslangan o‘zaro manfaatli va samarali iqtisodiy sheriklikni kengaytirishga xizmat qilayotganini ta’kidladi.
Keyingi ikki yilda ushbu sohadagi aloqalar yangi bosqichga ko‘tarildi. Hududlar va ishbilarmonlar o‘rtasidagi rishtalar faollashdi. Natijada savdo-iqtisodiy hamkorlik izchil rivojlanmoqda. 2018-yil bu borada jadal yuksalish davri bo‘ldi. Tovar ayirboshlash hajmi qariyb 50 foizga o‘sib, 3 milliard dollardan oshdi.
Tomonlar, avval kelishilganidek, yaqin yillarda bu ko‘rsatkichni 5 milliard dollarga yetkazishga intilishini tasdiqladi. O‘zbekiston va Qozog‘iston o‘rtasida ikki tomonlama hamkorlik bo‘yicha hukumatlararo komissiyaga savdo aloqalari nomenklaturasini kengaytirish, iqtisodiy hamkorlikning yangi uzoq muddatli shakllarini topish va rivojlantirish vazifasi qo‘yildi.
Bu o‘zaro manfaatli iqtisodiy hamkorlikni mustahkamlash va kengaytirishga, savdo, investitsiyalar, logistika sohalarida yangi istiqbolli loyihalarni amalga oshirish, integratsiyalashgan sanoat texnoparklari, ilmiy-innovatsion klasterlar va erkin iqtisodiy zonalar tashkil etishga xizmat qiladi.
Tomonlar 2018-yil noyabr oyida Chimkent shahrida o‘tgan birinchi O‘zbekiston—Qozog‘iston hududlararo hamkorlik forumi hamda 2019-yil martda Toshkent shahrida o‘tgan Markaziy Osiyo mamlakatlarining birinchi mintaqaviy iqtisodiy forumi yakunlarini ijobiy baholadi.
Davlat rahbarlari O‘zbekiston—Qozog‘iston davlat chegarasini demarkatsiya qilish, shuningdek, o‘tkazish punktlarining samarali faoliyatini ta’minlash jarayoni muvaffaqiyatli davom etayotgani, bu ikki mamlakat chegaradosh hududlari aholisining turmush sharoitlarini salmoqli darajada yaxshilash, transchegaraviy iqtisodiy aloqalar va gumanitar almashinuvlarni jonlashtirish, fuqarolarning o‘zaro tashriflarini faollashtirishga xizmat qilganini mamnuniyat bilan qayd etdi.
Muzokaralarda transport, logistika, sanoat kooperatsiyasi sohalarida qo‘shma loyihalarni amalga oshirish bo‘yicha kelishuvlarga erishildi. Transport kommunikatsiyalari sohasidagi hamkorlikni rivojlantirish mamlakatlarning eksport salohiyati va tranzit imkoniyatlarini kengaytirishi qayd etildi.
Turizm, madaniyat, fan va ta’lim yo‘nalishlaridagi aloqalarni rivojlantirish masalalari ham ko‘rib chiqildi.
O‘tgan yili Qozog‘istonda O‘zbekiston yili keng miqyosda o‘tkazilgani, uning doirasidagi tadbirlar xalqlar o‘rtasidagi do‘stlik va qardoshlik munosabatlarini yanada mustahkamlagani ta’kidlandi. Mazkur ulkan madaniy voqeaning mantiqiy davomi sifatida bu yil O‘zbekistonda Qozog‘iston yili bo‘ladi va u Qozog‘iston prezidentining ushbu davlat tashrifi doirasida ochiladi.
Izoh (0)