Samarqand viloyati Pastdarg‘om tumani “Tinchlik” mahallasidan o‘tgan temiryo‘lda 28-mart kuni soat taxminan 11:30 atrofida tumanning “Imomjon qadimiy yodgorligi” mahallasida yashovchi D.Ch. ismli fuqaroni motovoz urib yuborgan.
Samarqand viloyat IIB Transportda jamoat xavfsizligini ta’minlash bo‘limi matbuot xizmatining “Daryo”ga ma’lum qilishicha, voqea sodir bo‘lgan kuni 1970-yilda tug‘ilgan fuqaro D.Ch. piyodalar o‘tish yo‘lagidan mast holda velosiped boshqarib o‘tmoqchi bo‘lgan.
D.Ch. o‘zining ehtiyotsizligi oqibatida harakatlanib kelayotgan motovozga borib urilgan. Voqea oqibatida og‘ir tan jarohati bilan shifoxonaga yotqizilgan D.Ch.ning o‘ng oyog‘i tizzadan pastki qismi kesib tashlangan.
Temir yo‘llarda sodir bo‘ladigan noxush holatlarning oldini olish maqsadida O‘zbekiston IIV Transportda xavfsizlikni ta’minlash bosh boshqarmasi tomonidan har chorshanba “Temiryo‘llarda xavfsizlik kuni” deb belgilandi. Ushbu rejaga muvofiq temir yo‘l atrofida joylashgan xonadonlarda, o‘quv muassasalari va korxona-tashkilotlarda xavfsizlik bo‘yicha profilaktik ogohlantiruv va tushuntirish ishlari olib borilmoqda.
Profilaktik tushuntirish ishlari jarayonida Samarqand shahrining “Hazora”, Samarqand tumanining “Quyiqaynama” mahallalaridan o‘tgan temir yo‘l atroflari qarovsiz holatga kelib maishiy chiqindilar tashlab ketilgan holati aniqlanib, zarur choralar ko‘rilgan.
Izoh (0)