Самарқанд вилояти Пастдарғом тумани «Тинчлик» маҳалласидан ўтган темирйўлда 28 март куни соат тахминан 11:30 атрофида туманнинг «Имомжон қадимий ёдгорлиги» маҳалласида яшовчи Д.Ч. исмли фуқарони мотовоз уриб юборган.
Самарқанд вилоят ИИБ Транспортда жамоат хавфсизлигини таъминлаш бўлими матбуот хизматининг «Дарё»га маълум қилишича, воқеа содир бўлган куни 1970 йилда туғилган фуқаро Д.Ч. пиёдалар ўтиш йўлагидан маст ҳолда велосипед бошқариб ўтмоқчи бўлган.
Д.Ч. ўзининг эҳтиётсизлиги оқибатида ҳаракатланиб келаётган мотовозга бориб урилган. Воқеа оқибатида оғир тан жароҳати билан шифохонага ётқизилган Д.Ч.нинг ўнг оёғи тиззадан пастки қисми кесиб ташланган.
Темир йўлларда содир бўладиган нохуш ҳолатларнинг олдини олиш мақсадида Ўзбекистон ИИВ Транспортда хавфсизликни таъминлаш бош бошқармаси томонидан ҳар чоршанба «Темирйўлларда хавфсизлик куни» деб белгиланди. Ушбу режага мувофиқ темир йўл атрофида жойлашган хонадонларда, ўқув муассасалари ва корхона-ташкилотларда хавфсизлик бўйича профилактик огоҳлантирув ва тушунтириш ишлари олиб борилмоқда.
Профилактик тушунтириш ишлари жараёнида Самарқанд шаҳрининг «Ҳазора», Самарқанд туманининг «Қуйиқайнама» маҳаллаларидан ўтган темир йўл атрофлари қаровсиз ҳолатга келиб маиший чиқиндилар ташлаб кетилган ҳолати аниқланиб, зарур чоралар кўрилган.
Изоҳ (0)