Toshkent viloyatida qasddan odam o‘ldirishga urinishda ayblanayotgan talabaning onasi e’tiroz bildirmoqda

Joriy yilning 7-aprel kuni soat 01:30 larda Yangiyo‘l tumani “Ahil” mahallasida yashovchi A.A. (1993-y.t, Toshkent davlat agrar universitetining 3-bosqich talabasi) shu mahalladagi “Senyor Pomidor pasta & BBQ” kafesi oldida fuqaro B.X. (1992-y.t, ishsiz) bilan rashk sababli janjallashgani va fuqaro A.A.ga nisbatan O‘zbekiston Respublikasi Jinoyat kodeksining tegishli moddasi bilan, ya’ni qasddan odam o‘ldirishga suiqasd qilish bilan jinoyat ishi qo‘zg‘atilib, tergov harakatlari olib borilayotgani haqidagi ma’lumot berilgan edi.

Ayni vaqtda O‘zAga ayblanuvchining onasidan shikoyat kelib tushdi.

“O‘g‘lim jabrlanuvchi bilan tanish bo‘lmagani bois uni qasddan odam o‘ldirishda ayblanishi noto‘g‘ri. Uch farzandni ham ota, ham ona o‘rnida tarbiyalab kelyapman. Bu bola to‘ng‘ich farzandim. U ovqatlanish uchun uyimiz yonidagi kafega ukasi bilan kirgan va u yerda hech qanday qiz bola bo‘lmagan. Qo‘shni tumanda yashovchi yigit bilan mushtlashgan, keyin pichoqbozlik bo‘lgan. Jabrlangan yigitning tepasida turibmiz, ahvoli yaxshi, ota-onasi tuzalib ketsa, da’vo qilmaymiz, deyishdi. Tarqatilayotgan ma’lumotlarning to‘liq asoslanmagani haqida prokuraturaga va 1007 ga shikoyat qildim. Sud-ekspertizani qayta o‘tkazishga va’da berishdi. Axir, ne hasratda uch yildan buyon kontrakt – shartnoma asosida o‘qishiga pul to‘lab kelamiz, baxtsiz tasodif tufayli, noto‘g‘ri ma’lumot tarqatib, o‘g‘limni juvonmarg qilmanglar”, – deydi Shohista opa.

Mazkur shikoyat yuzasidan Yangiyo‘l tuman prokuraturasi quyidagicha izoh bergan:

“Shikoyatda keltirilgan barcha vajlar tergov jarayonida o‘rganib chiqiladi va holatlarga aniqlik kiritiladi. Hozircha jinoyat protsessual talablariga ko‘ra, tergovning ma’lumotlarini oshkor qilish mumkin emas”.

Bunday izoh esa ayblanuvchining onasini qanoatlantirmay, e’tiroziga sabab bo‘lmoqda.

“Unda nega surishtirish ishlari oxiriga qadar olib borilmay, sudning qarori chiqmasdan, voqea joyidayoq o‘g‘limni qasddan odam o‘ldirishda ayblashdi. Va buni OAVda e’lon qilishdi, bunga kim javob beradi? O‘g‘limni qamalishidan kim manfaatdor?”