Borovskiy kolleji o‘quvchisi Jasurbek Ibrohimovning o‘limi ishi bo‘yicha 2017-yil kuzida sudlangan uning kollejdoshi — Islombek To‘laganov muddatidan avval ozodlikka chiqarilgani yuzasidan marhumning onasi Nilufar Aliyeva va jabrlanuvchilarning advokati Lola Ismoilova Repost’ga izoh berdi.
“To‘laganov 2018-yil 21-dekabrda ozod qilingan. Biz bundan kecha xabar topdik va bu yangilikdan hamon shok holatidamiz”, — dedi Nilufar Aliyeva.
Sudda Jasurbek Ibrohimov oilasining manfaatlarini himoya qilayotgam advokat Lola Ismoilova ham hodisadan kechagina xabardor bo‘lganini aytdi.
“Huquqshunos sifatida nima uchun bunday qilganliklarini tushuna olmayapman. Men hozir Jazoni ijro etish boshqarmasidan yozma rasmiy javob olishim kerak, so‘ng ozodlikka chiqarish haqida qaror qabul qilgan sudga advokatlik so‘rovini jo‘nataman va sud qarorini olganimdan keyingina qabul qilingan qarorning qonuniy yoki noqonuniyligini muhokama qilish mumkin”, — dedi u.
Advokatning qo‘shimcha qilishicha, Ibrohimovlar oilasi To‘laganovning muddatidan oldin ozod qilinishi haqidagi sud qarori ustidan shikoyat berishga qat’iy qaror qilgan. “Jabrlanuvchi tomonning advokati sifatida taxmin qilishimcha, jazo choralarining yumshatilishi bemahal amalga oshirilgan”, — dedi u.
Eslatib o‘tamiz, Borovskiy kolleji o‘quvchisi Jasurbek Ibrohimovning o‘limi ishi bo‘yicha 2017-yil kuzida sudlangan uning kollejdoshi — Islombek To‘laganov muddatidan avval ozodlikka chiqarilgan.
Jazoning o‘talmagan qismi 4 yil 5 oy 15 kun davomida axloq tuzatish ishlari va ish haqining davlat hisobiga 20 foizi ushlanib qolishiga almashtirildi.
Izoh (0)