Qashqadaryo viloyat bojxona boshqarmasi tomonidan huquqni muhofaza qiluvchi idoralar xodimlari bilan hamkorlikda Chiroqchi tumanida o‘tkazilgan tezkor tadbir davomida 7,5 tonna mineral o‘g‘it noqonuniy olib chiqilishiga chek qo‘yildi. Bu haqda “Daryo”ga Bojxona qo‘mitasi matbuot xizmati ma’lum qildi.
Aniqlanishicha, viloyat “Agrokimyohimoya” AJ Kasbi tumani filialida mudir lavozimida ishlab kelgan Q.Sh. javobgarligi ostidagi og‘irligi 7,5 tonna sulfat ammoniy mineral o‘g‘itini faoliyatini tugatganiga 2 oy bo‘lgan fermer xo‘jaliklaridan birining raisi M.A. va boshqalar bilan til biriktirib, fuqaro I. I. boshqaruvidagi Isuzu rusumli avtomashinaga yuklab, soxta hujjatlar asosida Samarqand viloyatiga olib ketayotganida to‘xtatib qolindi.
Hozirda mazkur holat yuzasidan Q.Sh. va uning sheriklariga nisbatan Jinoyat Kodeksining tegishli moddalari bilan jinoyat ishi qo‘zg‘atilib, tegishliligiga ko‘ra tergov idoralariga yuborildi.
Izoh (0)