Termizda bo‘lib o‘tayotgan I Xalqaro baxshichilik san’ati festivalida tashkil etilgan “Buxoro” pavilonidagi “Nodir kitoblar” kutubxonasi ishtirokchilar va mehmonlar e’tiborini qozondi. Bu haqda “Daryo” muxbiri xabar bermoqda.
“Nodir kitoblar” kutubxonasi durdona kitoblar hamda qo‘llanmalar bilan boyitilgan. Nodir xalq dostonlari va termalari audio va video shakllarda pavilonga tashrif buyurganlarga tarqatilmoqda.
— Baxshichilik san’ati tarixiga oid ko‘rgazma, o‘zbek, fors, arab, ingliz va rus tillarida nashr etilgan ilmiy-tadqiqot asarlari hamda ilmiy-ma’rifiy adabiyotlardan iborat nodir durdonalar kutubxonasi ko‘pchilikka manzur bo‘ldi. “Alpomish”, “Kuntug‘mish”, “Oltin qaboq”, “Suluvxon”, “Oyparcha” kabi eng sara baxshilar tomonidan kuylangan g‘azal-dostonlarning terma audio disklari boshqa viloyatlar hamda xorijdan kelgan mehmonlarga taraqatildi. Shuningdek, gullardan qo‘l mehnati bilan 5x3 hajmda tayyorlangan ochilgan kitob ko‘rinishidagi san’at asari ham e’tibor markazida bo‘ldi, — deydi Buxoro viloyati hokimi o‘rinbosari Jamol Nosirov.
Birinchi xalqaro baxshichilik san’ati festivalida “Mavji Buxoro” folklor jamoasi, “Buxoro go‘zallari” raqs ansambli chiqishlari, shuningdek, usta-hunarmandlarning ko‘rgazmalari vohaning o‘ziga xosligi namoyon etmoqda.
Izoh (0)