O‘zbekiston Milliy Gvardiyasi Qashqadaryo viloyati Qo‘riqlash boshqarmasi tizimida xizmat olib borgan 25 nafar faxriy xodimni tantanali ravishda nafaqaga kuzatish marosimi bo‘lib o‘tdi. Bu haqda “Daryo”ga Milliy Gvardiya Qashqadaryo viloyati Qo‘riqlash boshqarmasi matbuot xizmati xabar bermoqda.
Xabarga ko‘ra, tadbirda so‘z olgan Milliy Gvardiya Janubiy-g‘arb taktik guruhi komandiri, podpolkovnik Umid Azimov hamda viloyat Qo‘riqlash boshqarmasi boshlig‘i, polkovnik Kamoliddin Yo‘ldoshevlar faxriylarga hurmat ko‘rsatib, ularning soha rivoji uchun qo‘shgan hissasini alohida e’tirof etdi. Faxriy xodimlarga zarbof to‘n kiygizilib, qimmatbaho sovg‘alar ulashildi.
Tadbir rejasiga ko‘ra, kunning ikkinchi yarmida faxriy xodimlar Qarshi shahrida qad rostlagan Birinchi Prezident Islom Karimov haykali poyiga gulchambarlar qo‘yib, hurmat bajo keltirdi. So‘ngra, Motamsaro ona haykalini ziyorat qilib, shahardagi qurilish-obodonlashtirish ishlari bilan tanishdi. Kun bo‘yi davom etgan tadbir ko‘tarinki ruhda yakunlandi, deyiladi matbuot xizmati xabarida.
Izoh (0)