Ўзбекистон Миллий Гвардияси Қашқадарё вилояти Қўриқлаш бошқармаси тизимида хизмат олиб борган 25 нафар фахрий ходимни тантанали равишда нафақага кузатиш маросими бўлиб ўтди. Бу ҳақда «Дарё»га Миллий Гвардия Қашқадарё вилояти Қўриқлаш бошқармаси матбуот хизмати хабар бермоқда.
Хабарга кўра, тадбирда сўз олган Миллий Гвардия Жанубий-ғарб тактик гуруҳи командири, подполковник Умид Азимов ҳамда вилоят Қўриқлаш бошқармаси бошлиғи, полковник Камолиддин Йўлдошевлар фахрийларга ҳурмат кўрсатиб, уларнинг соҳа ривожи учун қўшган ҳиссасини алоҳида эътироф этди. Фахрий ходимларга зарбоф тўн кийгизилиб, қимматбаҳо совғалар улашилди.
Тадбир режасига кўра, куннинг иккинчи ярмида фахрий ходимлар Қарши шаҳрида қад ростлаган Биринчи Президент Ислом Каримов ҳайкали пойига гулчамбарлар қўйиб, ҳурмат бажо келтирди. Сўнгра, Мотамсаро она ҳайкалини зиёрат қилиб, шаҳардаги қурилиш-ободонлаштириш ишлари билан танишди. Кун бўйи давом этган тадбир кўтаринки руҳда якунланди, дейилади матбуот хизмати хабарида.
Изоҳ (0)