Qozog‘iston birinchi prezidentining qizi Darig‘a Nazarboyevaning senat spikeri etib saylanishi Nazarboyevlar oilasining o‘rnini mustahkamladi. Shuningdek, siyosatchi kelajakda prezidentlik lavozimigacha borishi mumkinligini ko‘rsatdi, deya hisoblaydi Moskva davlat xalqaro munosabatlar instituti Markaziy Osiyo va Afg‘oniston masalalari tadqiqoti markazi direktori Andrey Kazansev. Bu haqda “RIA Novosti” xabar berdi.
20-mart kuni Qozog‘iston parlamenti senati Darig‘a Nazarboyevani spiker etib saylagan. Yangi spikerning saylanishiga avvalgi spiker Qosim-Jomart Tokayevning Qozog‘iston prezidenti lavozimiga o‘tgani sabab bo‘lgan.
Nazarboyevaning yangi lavozimga saylangani oilaning o‘rnini mustahkamlaydimi yoki uning siyosiy faoliyatida keyingi marralarga yetishiga tayyorgarlikmi degan savolga Kazansev “ikkalasi ham bo‘lishi mumkin” deb javob bergan.
“Ya’ni bir tomondan O‘zbekistonda Gulnora Karimova bilan bog‘liq vaziyat hammaga ma’lum. Albatta, Nazarboyev bunday hol uning oilasida ham takrorlanishiga yo‘l qo‘ymaydi. Shuning uchun Darig‘aning ushbu lavozimga saylangani Nazarboyevlar oilasi bilan hammasi yaxshi bo‘lishini kafolatlaydi”, — deydi Kazansev.
Lekin, uning so‘zlariga ko‘ra, bu Nazarboyevaning keyingi siyosiy o‘sishiga to‘siq bo‘lmaydi.
“Darig‘a Qozog‘istondagi eng tajribali siyosatchilardan biri. Uning o‘sishiga imkon bor, shuningdek, otasining ta’siri ham. Hozir hamma narsa bo‘lishi mumkin”, — qo‘shib qo‘yadi u.
U kelajakda Qozog‘iston prezidenti bo‘lishi mumkinmi, degan savolga siyosatshunos “Menimcha, ha. Lekin voqealar rivojini kuzatish kerak. Saylov kampaniyalari boshlangach, hammasi aniq bo‘ladi. Lekin ekspertlarning taxminiy ro‘yxatida Darig‘a yo‘q. Shuning uchun, buni hozirdan muhokama qilmagan ma’qul”, — deb javob bergan.
Qozog‘istonning oldida hali uzoq o‘tish davri turibdi. “Nima bo‘lganda ham Qozog‘istonning keyingi prezidenti Nazarboyevning siyosatini olib boradi. U xoh Tokayev, xoh Darig‘a bo‘lsin,” — deydi ekspert.
Izoh (0)