O‘zbekistonning turistik shiori — “Tabiiy betakror!” (Naturally irresistible!) kutilgan natijani bermasligi mumkin. Chunki u boshqa mamlakatlar shiorlari bilan solishtirganda o‘ylab topilgan, g‘aliz, notabiiy tushunchaga o‘xshaydi. Bu haqda filologiya fanlari buyicha falsafa doktori Beruniy Alimov fikr yuritgan.
Hindistonning “Hayratomuz Hindiston” (Incredible India), Turkiyaning “Bizning mehmonimiz bo‘ling”(Be our guest) va Xitoyning “Xitoy avval bunday bo‘lmagan” (China Like Never Before) shiorlari bir muncha maftunkor eshitiladi.
Turizmni rivojlantirish qo‘mitasi 72 ta davlatdan kelgan 5,7 ming nafar sayyoh orasida tadqiqot o‘tkazgan. Ma’lum bo‘lishicha, turistlarning ko‘pchiligi do‘stlari va oila a’zolari, shuningdek, ijtimoiy tarmoqlar orqali berilgan maslahatlar asosida O‘zbekistonga kelishga qaror qilgan. Qolaversa, gazeta va jurnallar, hujjatli filmlar va yangiliklar dasturlari ham bu borada muhim o‘rin tutishi ma’lum bo‘lgan.
Demak, O‘zbekistonning turistik jozibadorligi oshishiga xizmat qiluvchi dolzarb axborot resurslarini, O‘zbekistonning noyob tarixi, o‘tgan buyuk allomalari va olimlari, diqqatga sazovor joylari, milliy taomlari, an’analari haqida hujjatli filmlar va teleko‘rsatuvlar yaratish va tarqatishni ko‘paytirish zarur.
Bunda turistlarni nafaqat jalb etishga e’tibor qaratish zarur. Toki ular mamlakatga yana muntazam ravishda kelsin va o‘z davlatlaridagi do‘stlariga ham buni tavsiya etsin.
Kelayotgan har bir sayyoh diqqatga sazovor joylarni tomosha qilishdan tashqari to‘laqonli turistik mahsulotlardan bahramand bo‘lishga haqli. Buning uchun hudud imijini shakllantirish bo‘yicha alohida dasturlarni joriy etish kerak bo‘ladi.
Xalqaro media makonda turistik imijni mustahkamlash uchun quyidagi ishlarni amalga oshirish kerak:
Umuman olganda jahon media makonida O‘zbekiston imijini shakllantirish va uni himoya qilishning yagona davlat strategiyasini (dasturi) ishlab chiqish zarur. Mamlakatning ijobiy imiji bo‘yicha milliy strategiyani amalga oshiruvchi tashkilotni aniqlash, belgilash kerak bo‘ladi. Milliy brending bo‘yicha Prezident kengashi / Presidential Council on National Branding tashkil etish lozim.
Amalga oshirilishi zarur bo‘lgan kompleks chora-tadbirlar qatorida quyidagilarni alohida sanab o‘tish mumkin:
Mintaqaviy (Markaziy Osiyo, MDH, ShHT) va global axborot makonidagi OAV bilan teng raqobat olib boruvchi yirik milliy media-xoldinglarni tashkil etish;
Rivojlangan xorijiy mamlakatlardagi OAV va tadqiqot markazlari bilan o‘zaro hamkorlik aloqalarini yangi bosqichga ko‘tarish;
Yetakchi xorijiy tillarda efirga uzatiladigan sun’iy yo‘ldosh telekanalini tashkil etish;
Xorijiy davlatlardagi ommaviy axborot vositalarining aksiyalarini, ulushlarini sotib olish va ular bilan teng munosabatlarga kirishish vositasida jahon media bozori (makoni)ga to‘g‘ridan-to‘g‘ri chiqib olish;
Jurnalistika bo‘yicha oliy ta’lim muassasalarida “Trevel-jurnalistika” (travel journalism) yo‘nalishini ochish va uni rivojlantirish.
Izoh (0)