Ўзбекистоннинг туристик шиори — «Табиий бетакрор!» (Naturally irresistible!) кутилган натижани бермаслиги мумкин. Чунки у бошқа мамлакатлар шиорлари билан солиштирганда ўйлаб топилган, ғализ, нотабиий тушунчага ўхшайди. Бу ҳақда филология фанлари буйича фалсафа доктори Беруний Алимов фикр юритган.
Ҳиндистоннинг «Ҳайратомуз Ҳиндистон» (Incredible India), Туркиянинг «Бизнинг меҳмонимиз бўлинг»(Be our guest) ва Хитойнинг «Хитой аввал бундай бўлмаган» (China Like Never Before) шиорлари бир мунча мафтункор эшитилади.
Туризмни ривожлантириш қўмитаси 72 та давлатдан келган 5,7 минг нафар сайёҳ орасида тадқиқот ўтказган. Маълум бўлишича, туристларнинг кўпчилиги дўстлари ва оила аъзолари, шунингдек, ижтимоий тармоқлар орқали берилган маслаҳатлар асосида Ўзбекистонга келишга қарор қилган. Қолаверса, газета ва журналлар, ҳужжатли фильмлар ва янгиликлар дастурлари ҳам бу борада муҳим ўрин тутиши маълум бўлган.
Демак, Ўзбекистоннинг туристик жозибадорлиги ошишига хизмат қилувчи долзарб ахборот ресурсларини, Ўзбекистоннинг ноёб тарихи, ўтган буюк алломалари ва олимлари, диққатга сазовор жойлари, миллий таомлари, анъаналари ҳақида ҳужжатли фильмлар ва телекўрсатувлар яратиш ва тарқатишни кўпайтириш зарур.
Бунда туристларни нафақат жалб этишга эътибор қаратиш зарур. Токи улар мамлакатга яна мунтазам равишда келсин ва ўз давлатларидаги дўстларига ҳам буни тавсия этсин.
Келаётган ҳар бир сайёҳ диққатга сазовор жойларни томоша қилишдан ташқари тўлақонли туристик маҳсулотлардан баҳраманд бўлишга ҳақли. Бунинг учун ҳудуд имижини шакллантириш бўйича алоҳида дастурларни жорий этиш керак бўлади.
Халқаро медиа маконда туристик имижни мустаҳкамлаш учун қуйидаги ишларни амалга ошириш керак:
Умуман олганда жаҳон медиа маконида Ўзбекистон имижини шакллантириш ва уни ҳимоя қилишнинг ягона давлат стратегиясини (дастури) ишлаб чиқиш зарур. Мамлакатнинг ижобий имижи бўйича миллий стратегияни амалга оширувчи ташкилотни аниқлаш, белгилаш керак бўлади. Миллий брендинг бўйича Президент кенгаши / Presidential Council on National Branding ташкил этиш лозим.
Амалга оширилиши зарур бўлган комплекс чора-тадбирлар қаторида қуйидагиларни алоҳида санаб ўтиш мумкин:
Минтақавий (Марказий Осиё, МДҲ, ШҲТ) ва глобал ахборот маконидаги ОАВ билан тенг рақобат олиб борувчи йирик миллий медиа-холдингларни ташкил этиш;
Ривожланган хорижий мамлакатлардаги ОАВ ва тадқиқот марказлари билан ўзаро ҳамкорлик алоқаларини янги босқичга кўтариш;
Етакчи хорижий тилларда эфирга узатиладиган сунъий йўлдош телеканалини ташкил этиш;
Хорижий давлатлардаги оммавий ахборот воситаларининг акцияларини, улушларини сотиб олиш ва улар билан тенг муносабатларга киришиш воситасида жаҳон медиа бозори (макони)га тўғридан-тўғри чиқиб олиш;
Журналистика бўйича олий таълим муассасаларида «Трэвел-журналистика» (travel journalism) йўналишини очиш ва уни ривожлантириш.
Изоҳ (0)