Bugun, 12-mart kuni Oliy Majlis Qonunchilik palatasining Innovatsion rivojlanish, axborot siyosati va axborot texnologiyalari masalalari qo‘mitasi tomonidan “Ochiqlik va demokratiyani ta’minlashda bosma nashrlarning roli” mavzusida davra suhbati tashkil etildi. Bu haqda “Daryo” muxbiri Sevara Nishonova xabar berdi.
Davra suhbatida deputatlar, markaziy bosma nashrlarda faoliyat yuritayotgan jurnalistlar va soha mutaxassislari ishtirok etdi. Tadbirda OAV sohasidagi ishlarni yanada rivojlantirish uchun qonunchilikning istiqbollarini belgilash masalalari muhokama qilindi.
“Majburiy obunaga barham berish ishlari doirasida ixtiyoriy obuna ham yo‘q bo‘lib ketmoqda. Bu holatdan biz ham havotirdamiz.
Yillar davomida o‘z o‘rniga ega bo‘lgan bosma nashrlarlarning yashab qolishini xohlaymiz. Qanday yo‘l bilan ularni qo‘llab-quvvatlasak bo‘ladi, degan masala bizni anchadan beri qiynamoqda.
Biz bugungi kun talabidan kelib chiqib bosma nashrlarni ko‘proq qo‘llab-quvvatlash kerak, deb o‘ylaymiz. Chunki, necha yillik o‘z tarixiga ega, o‘riniga ega ayrim nashrlarimiz bugun chiqmayapti. Bu esa yaxshi emas”, — deydi davra suhbatida so‘zga chiqqan Oliy Majlis Qonunchilik palatasi deputati Rasul Kusherbayev.
Shuningdek, deputat vazirliklar, yuqori tashkilotlar muassisligida tashkil etilgan bosma nashrlar faoliyatini ham qayta ko‘rib chiqish lozimligini aytib o‘tdi:
“Vazirliklar, tashkilotlar boshqa dunyo, ularning nashrlari boshqa dunyo. Ularning orasida chuqur jarlik yuzaga kelgan. O‘rganishlar davomida ushbu muammoga qanday barham berish yuzasidan vazirlar bilan suhbatlashdik. Ular mutlaqo boshqacha fikrda.
Vazirlik va idoralar o‘zlari tashkil etgan gazeta 100 foiz o‘sha tashkilot targ‘iboti bilan shug‘ullanishi kerak, degan fikrda.
‘Nashr meni reklama qilmasa, uning menga nima keragi bor?’ degan masala ham ko‘tarilmoqda. Bir tomondan muassis nuqtayi nazaridan qaraganda bu fikr to‘g‘ridir. Lekin qonunan to‘g‘ri emas. Biz OAVni muassisdan xoli ravishda ijodiy erkin tarzda faoliyat yuritadi, deb kafolat beryapmizda, baribir nashrni muassisning qo‘liga tashlayapmiz. Muassisning dunyoqarashi umuman boshqacha. O‘zining nashri bilan ishi bo‘lmagan muassisga bunday nashrni nima keragi bor, o‘zi? Bunday holda muassis nashrdan kechishi kerak yoki tahririyat muassisni o‘zgartirishi kerak. U nashrning minglab auditoriyasini hech kim o‘ylamayapti”.
Deputatning fikricha, majburiy obunaga qarshi kurash ortidan o‘qituvchilar o‘zlari uchun kerakli nashrga ham obuna bo‘la olmayapti:
“Ayrim maktablarda majburiy obunani yo‘q qilamiz deb, ixtiyoriy obunani ham yo‘q qilib qo‘ydik. O‘qituvchilar istasa ham gazetalarga obuna bo‘lolmayapti. Bunga o‘zim guvoh bo‘ldim hududlarda. Mendan so‘rashyapti ‘Ma’rifatga obuna bo‘lsak maylimi? Bizga kerak shu. O‘zimizning metodik materiallarimiz chop etiladi shu gazetada. Obuna bo‘lamiz desak, yig‘ilib bu majburiy obuna deb boshqacha kampaniya boshlanyapti’ deb.
Ba’zan sochni olamiz deb, boshni olib yuboryapmiz”, — deydi deputat.
Izoh (0)