Bugun, 12-mart kuni Oliy Majlis Qonunchilik palatasining Innovatsion rivojlanish, axborot siyosati va axborot texnologiyalari masalalari qo‘mitasi tomonidan “Ochiqlik va demokratiyani ta’minlashda bosma nashrlarning roli” mavzusida davra suhbati tashkil etildi. Bu haqda “Daryo” muxbiri Sevara Nishonova xabar berdi.
Davra suhbatida deputatlar, markaziy bosma nashrlarda faoliyat yuritayotgan jurnalistlar va soha mutaxassislari ishtirok etdi. Tadbirda OAV sohasidagi ishlarni yanada rivojlantirish uchun qonunchilikning istiqbollarini belgilash masalalari muhokama qilindi.
Davra suhbati avvalida mavzu yuzasidan o‘z fikrlari bilan o‘rtoqlashgan Sa’dulla Hakimov gazetalarning shablonga tushib qolganini qoraladi.
“Saytlar jurnalistikada odimlab ketyapti. Ular qachonlardir ijtimoiy hayotdan chetga chiqib ketgan jurnalistlar, adiblarga fikrini aytish imkonini bermoqda. Bosma nashrlarimiz, gazetalarimizning eng katta fojiasi — shablon, tili g‘aliz.
Nima uchun Prezidentimiz Xalq qabulxonalarini tashkil etdi? Chunki xalq qabulxonalari vazifasini bajarishi kerak bo‘lgan ommaviy axborot vositalari bir qolipga tushib qolgan edi”, — deydi O‘zbekiston jurnalistlari ijodiy uyushmasi raisi Sa’dulla Hakimov.
Sa’dulla Hakimov jurnalistlar kasbiy etikasi haqida gapira turib, ayrim OAV vakillari tanqidiy maqolada shaxsiyatga o‘tib ketayotganini qayd etib o‘tdi:
“Bizda tanqidchilar shaxsga ozor berib lazzatlanadi. Qonunda bunday qilish mumkinmasligi yozilgan, lekin amal qilinmaydi.
Aslida tanqid mavjud muammoga barham berish uchun xizmat qilishi kerak.
Tanqidni yoz desang, ijtimoiy muammolarni ko‘tarib unga barham berish yo‘lini izlash o‘rniga shaxsiyatga teginib bir lazzatlanib olgimiz keladi”.
Izoh (0)