6-mart kuni Toshkent shahrida OAV vakillari O‘zbekistonning mashhur sportchi va chempionlari bilan norasmiy uchrashuv o‘tkazdi. Tadbir HumoArena muz kompleksining ochilish marosimi oldidan bo‘lib o‘tdi, deya xabar berdi “Darakchi” nashri.
Uchrashuvda o‘zbek sporti yulduzlari - Ruslan Nuriddinov, Azamat Abduraimov, Oksana Chusovitina, Abdulla Tangriyev, Iroda To‘laganova, Mirjalol Qosimov va Shamsiddin Vohidovlar ishtirok etdi.
Tadbirda sportchilar HumoArena muz sport saroyining ochilishi haqidagi fikrlarini bildirdi:
Ruslan Nuriddinov, og‘ir atletika bo‘yicha Olimpiya chempioni:
“HumoArena haqida gapiradigan bo‘lsak, uning ochilishi O‘zbekistonda qishki sport turlarini rivojlantirish uchun juda katta imkoniyatlarga yo‘l ochadi. Umid qilamizki, qishki sport turlari butun O‘zbekiston bo‘ylab rivojlanadi, buning uchun birinchi, eng katta qadam tashlandi. Shu ishni viloyatlar kesimida ham davom ettirilsa va bundan barcha birdek manfaatdor bo‘lsa, harakatlar o‘z natijasini bermay qolmaydi ”.
Jahon gimnastikasi afsonasi, Oksana Chusovitina:
“Bunday arena O‘zbekistonga juda kerak edi. Hali ko‘p ota-onalar arenaga o‘z farzandlarini qishki sportlari bilan shug‘ullanish uchun ham olib kelishadi, deb o‘ylayman, chunki bu O‘zbekiston uchun yangilik”.
Iroda To‘laganova, O‘zbekiston tennis federatsiyasi bosh kotibi, tennis bo‘yicha respublika ayollar terma jamoasi bosh murabbiysi, yakka bahslarda 3 martadan WTF va ITF turnirlari g‘olibi:
“Bizda anchadan beri qishki sport turlari bo‘lmagan edi, shu bois muz arenasining ochilishi mamlakat uchun katta yutuqdir. U yerda shuningdek xalqaro darajadagi musobaqalarni o‘tkazish mumkin bo‘ladi, zero kompleks ko‘p funksional bo‘lib, u yerda qator sport turlari bo‘yicha musobaqalar o‘tkazish mumkin bo‘ladi”.
Azamat Abduraimov, futbol bo‘yicha 1994-yilgi Osiyo o‘yinlari chempioni, ayni damda murabbiy:
“Aytilgan barcha fikrlarga qo‘shilgan holda, shuni aytmoqchi edimki, barchamiz televizor orqali figurali uchish va xokkey musobaqalarini sevib tomosha qilamiz, O‘zbekistonda qurilgan HumoArena sport saroyida ana shunday musobaqalar va festivallar o‘tkazilsa, vatandoshlarimiz u yerga tashrif buyurib, ushbu musobaqalarni o‘z ko‘zlari bilan tomosha qilish imkoniga ega bo‘lishadi, bu juda muhim”.
Mirjalol Qosimov, o‘zbek futbolining yetakchi namoyondalaridan biri, uch karra O‘zbekiston chempioni, Rossiyaning futbol bo‘yicha chempioni, futbol bo‘yicha 1994-yilgi Osiyo o‘yinlari chempioni:
“Birinchi navbatda ota-onalar o‘zlarining turli yoshdagi farzandlarini olib kelishi va ularning sportga bo‘lgan qiziqishini qo‘llab-quvvatlashlari uchun ularning orasida targ‘ibot ishlarini o‘tkazish zarur. Ota-onalar farzandlarining tabiati, ularning temperamentini va sportning aynan qaysi turi bolaga to‘g‘ri kelishini yaxshi bilishadi. HumoArena muz kosmpleksining o‘zi — ko‘p funksionalli, demak, u yerda turli seksiyalar va yo‘nalishlar yo‘lga qo‘yiladi. Ko‘p narsa ommaviy axborot vositalariga bog‘liq: motivatsiya beruvchi roliklar, materiallar tayyorlash zarur, toki ota-onalar bundan xabar topib, farzandlarini sport bilan shug‘ullanish uchun olib kelishsin. Bu millat kelajagi uchun ham juda katta foyda bo‘ladi”.
Izoh (0)