Qashqadaryo viloyati hokimining hududlarni rivojlantirish hamda xalq deputatlari mahalliy Kengashlari faoliyati haqidagi hisoboti yuzasidan senator Tolibjon Madumarov muzokara o‘tkazdi, deb xabar berdi “Xalq so‘zi”.
Jumladan, u quyidagi fikrlarni bildirib o‘tdi:
“Ayniqsa, taraqqiyotimizning yangi bosqichida Prezident tashabbuslari bilan Qashqadaryoda amalga oshirilayotgan islohotlar o‘zining samaralarini bermoqda.
2018-yilda viloyat yalpi hududiy mahsuloti hajmi 28,4 trillion so‘mga yetgan va 2017-yilga nisbatan o‘sish ko‘rsatkichlari 101 foizni tashkil etgan. 2018-yilda viloyatda 2 365 ta kichik biznes subyekti o‘z faoliyatini boshlagan va ularning soni qariyb 17 mingtaga yetgan.
Natijada viloyatda yaratilayotgan yangi ish o‘rinlari soni ham oshib bormoqda. 2018 yilda yaratilgan ish o‘rinlari soni 27 mingdan oshgan va bu boradagi prognoz parametrlari 101,5 foizga bajarilgan.
O‘zbekiston Respublikasi Prezidentining 2017 va 2018-yillarda viloyatga 3 marotaba amalga oshirilgan tashriflari davomida berilgan topshiriqlar ijrosi doirasida 450 dan ortiq loyiha tasdiqlangan.
Shuningdek, 2018-yilning o‘zida yangi loyihalarni ishga tushirish hisobiga xizmat ko‘rsatish va servis sohasida 1 595 ta, qishloq xo‘jaligida 2 453 ta yangi ish o‘rinlari yaratilganligi e’tiborlidir”.
Senator Qashqadaryo viloyatida hududlarni rivojlantirish hamda xalq deputatlari mahalliy Kengashlari faoliyati samaradorligini oshirishga salbiy ta’sir ko‘rsatayotgan ko‘plab muammo va kamchiliklar ham mavjudligini aytib o‘tdi.
“Ayniqsa, ayrim vazirlik va markaziy idoralarning viloyatdagi mavjud muammolar yechimiga kompleks yondashmayotgani, ularni hal etish bo‘yicha mahalliy hokimliklarning tashabbuslari, takliflari, aholining xohish-istaklari yetarli darajada inobatga olinmayotgani oqibatida qator masalalar dolzarbligicha qolmoqda. Masalan, O‘zbekiston Respublikasi Vazirlar Mahkamasi tomonidan tasdiqlangan Qashqadaryo viloyatining ayrim tumanlarini kompleks rivojlantirish bo‘yicha dasturlardagi qator chora-tadbirlar mas’ul vazirlik va idoralarning sustkashligi oqibatida o‘z vaqtida amalga oshirilmagan.
Dehqonobod tumanini 2018—2019-yillarda kompleks rivojlantirish chora-tadbirlari dasturiga muvofiq 2018-yil oxiriga qadar amalga oshirish va yakunlanishi lozim bo‘lgan jami 143 ta vazifadan 30 tasi bajarilmagan. Jumladan, Respublika darajasida bajarilishi belgilangan tuman tibbiyot birlashmasi binosini rekonstruksiya qilish hamda ‘Oqrabot’ qishlog‘i hududidagi ‘Oqsaroy’ tarixiy obidasini ta’mirlash ishlari zarur moliyaviy mablag‘lar ajratilmaganligi sababli amalga oshirilmagan. Mirishkor tumanini 2018—2019-yillarda kompleks rivojlantirish chora-tadbirlari dasturiga muvofiq 2018-yil uchun belgilangan 248 ta vazifadan 76 tasi ro‘yobga chiqarilmagan. Xususan, mablag‘ ajratilmaganligi sababli: ‘Avazcho‘l’ va ‘Amir Temur’ suv yig‘ish va tarqatish inshootlarini rekonstruksiyasi, aholiga tibbiy xizmat ko‘rsatish sifatini yaxshilash maqsadida yuqumli kasalliklarni aniqlash laboratoriyasini qurish; irrigatsiya inshooti uchun elektr uzatish tarmog‘ini qurish va rekonstruksiya qilish vazifalari bajarilmagan.
Uy-joy kommunal xizmat ko‘rsatish vazirligi tomonidan ayniqsa, viloyat shaharlaridagi, tumanlar markazlaridagi yillar davomida saqlanib qolgan kommunal sohaga oid muammolar yechimiga kompleks tarzda yondashilmayotgani aholining jiddiy e’tirozlariga sabab bo‘lmoqda.
Xususan, Qarshi shahridagi 1, 2-dahalardagi 46 ta ko‘p qavatli uyning 60 foizini ichki isitish tizimi ishdan chiqqan. Shahardagi 222 ta ko‘p qavatli uy uchun lokal qozonxonalarni qurish ishlari tegishli dasturlarda belgilangan bo‘lsa-da, shu kunga qadar boshlanmagan. Investitsiya dasturiga kiritilgan ‘Suvoqova’ DUK tizimidagi 18 ta obyektdan 7 tasida tegishli qurilish va rekonstruksiya ishlarini olib borish uchun zarur mablag‘lar o‘z vaqtida ajratilmagan.
Moliya vazirligi hamda boshqa mas’ul tuzilmalar tomonidan aholi va ijtimoiy muassasalarni ichimlik suvi bilan zarur hajmda ta’minlash bo‘yicha ko‘rilayotgan choralar yetarli emasligi oqibatida viloyatda istiqomat qilayotgan 3 mln.dan ortiq aholining qariyb 47 foizi tashib keltiriladigan ichimlik suvini iste’mol qilmoqda (ayrim tumanlarda esa pulli)”.
Parlament a’zosi Sog‘liqni saqlash vazirligi tomonidan sog‘liqni saqlash muassasalarining moddiy-texnika bazasini yaxshilash bo‘yicha kompleks chora-tadbirlar yetarli darajada ko‘rilmaganini ham bildirdi.
“Viloyatdagi sog‘liqni saqlash muassasalarining aksariyati mukammal ta’mirga muhtoj. Deyarli barchasida ichimlik suvi, gaz va issiqlik energiyasi ta’minoti bilan bog‘liq tizimli muammolar va 340 nafar shifokor yetishmasligi yuzaga kelgan. Birgina Kasbi tumanidagi eng zamonaviy tibbiy texnikalar bilan jihozlangan ‘Kasbi madad shifo’ xususiy tashxislash va davolash markazida qariyb 60 ming AQSh dollari evaziga xorijdan keltirilgan loporoskop jarrohlik amaliyotini o‘tkazishga mo‘ljallangan uskuna va LOR-kombayn uskunasi malakali mutaxassislar yetishmasligi sababli ishlatilmayapti”, — dedi u.
Uning fikricha, bu kabi aksariyat kamchiliklar faqat Qashqadaryo viloyatigagina xos emas.
“Har bir hududda mintaqalarning ijtimoiy-iqtisodiy taraqqiyotiga xalaqit berayotgan ko‘plab muammolar, yechimini kutayotgan dolzarb masalalar mavjud. Qolaversa, bu muammolarni faqatgina hududlarning o‘zlari hal etolmaydi. Ularning samarali hal etilishi uchun sohaga oid markaziy idoralar (vazirlik, davlat qo‘mitalari, agentliklar va boshqalar)ning amaliy sa’y-harakatlari, tegishli masalalarni hal etishga bo‘lgan kompleks yondashuvi talab etiladi”, — deya qo‘shimcha qildi u.
Izoh (0)