1-martning e’tiborga molik yangiliklari — “Daryo” dayjestida.
Oliy Majlis Senatining o‘n sakkizinchi yalpi majlisi o‘z ishini yakunladi.
Majlis kun tartibiga kiritilgan 23 ta masalaning 15 tasi kecha ko‘rib chiqilgan edi. Bugun senatorlar, vazirlik va idoralar rahbarlari qolgan 8 ta masalani muhokama qilish barobarida Inson huquqlari bo‘yicha vakili (ombudsman) Ulug‘bek Muhammadiyevning tuzilma 2018-yildagi faoliyatiga oid hisoboti, Adliya vaziri Ruslanbek Davletovning axboroti, Qashqadaryo viloyati hokimi Zafar Ro‘ziyevning hisoboti tinglandi. O‘zbekiston Respublikasi Bosh vaziri, Bosh vazir o‘rinbosarlariga parlament so‘rovlari yuborildi.
***
Prezidentning Namangan viloyatiga tashrifi bugun, 1-mart kuni ham davom etdi.
Namangan shahar hokimligida Prezident Shavkat Mirziyoyev raisligida viloyat faollarining videoselektor yig‘ilishi bo‘lib o‘tdi. Unda davlat rahbari Toshkentda kelgusida Prezident universiteti ochilishini ma’lum qildi.
Shuningdek, Shavkat Mirziyoyev Namangandagi yetakchi diagnostika markazi faoliyati bilan tanishdi.
***
Toshkent viloyatida yashovchi erkak sobiq xotinini o‘ldirish uchun 1500 dollarga “killer” yolladi.
2019-yil 11-fevral kuni Toshkent viloyati IIBga Chirchiq shahrida yashovchi 1970-yilda tug‘ilgan fuqaro B. Y ariza bilan murojaat qilib, tanishi Qibray tumanida yashovchi 1981-yilda tug‘ilgan D. A sobiq turmush o‘rtog‘i 1979-yilda tug‘ilgan Sh. Mni o‘ldirishi haqida topshiriq berib, evaziga unga 1 500 AQSh dollari miqdoridagi pullarni va’da qilayotganligini ma’lum qiladi.
***
Paxtachi tumanidagi maktabda YoChT fani o‘qituvchisi o‘quvchini urdi. O‘quvchining talog‘i yorilgan.
Ma’lumotlarga ko‘ra, J.X. maktabga forma bilan kelmagani uchun maktabning yoshlar yetakchisi A.G‘. o‘quvchining boshiga lineyka (jadval tayoq) bilan urgan. Voqea aynan shundan boshlangan. Shundan so‘ng maktab o‘qituvchisi D.B. ham uni urgan. Biroq D.B. nima sababdan J.X.ni urganligi hozircha noma’lum.
***
Toshkent xalqaro aeroportida Dubaydan uchib kelgan qiz qo‘lga olindi.
Chegara nazoratidan o‘tish chog‘ida Samarqand viloyati Narpay tumanida yashovchi fuqaro M.M., 7-noyabr 2016-yilda pasportida xorijga chiqish stikeri bo‘lmagan holda Toshkentdan Qirg‘izistonga, u yerdan esa Ummon davlatiga uchib, Ummondan Dubayga uchib borganligi aniqlangan.
Izoh (0)