O‘zLiDeP partiyasi a’zosi millatchilik janjalini keltirib chiqardi

Toshkent shahar hokimligining Facebook’dagi sahifasida chop etgan 78-uyni buzish haqidagi xabari ijtimoiy tarmoqning faol foydalanuvchilari va O‘zLiDeP partiyasi a’zosining janjali bilan yakunlandi deb yozadi “Nuz.uz”.

Janjal boshlanishiga O‘zLiDeP partiyasi a’zosi, Sankt-Peterburg davlat fuqaro aviatsiyasi universiteti talabasi Ismoil Bahodirov sabab bo‘lgan. U shahar hokimligi tashabbusini qo‘llab-quvvatlamoqchi bo‘lgan, biroq barcha izoh yozgan foydalanuvchilarni Rossiyaga haydab, haqoratli so‘zlar aytib, millatchilik qilgan. Hatto poytaxtning sobiq hokimi Rahmonbek Usmonovni eslab, uni korrupsioner deb atagan.

O‘zini haqoratlangan deb hisoblagan Maksim Chernikov va Svetlana Lisiskaya huquq tartibot organlariga murojaat qilgan. Shuningdek, Ismoil Bahodirovning izohlari yozilgan skrinshotlarni Facebook’dagi “TChSJ i kak s nim jit” guruhida chop etgan.

IIBBning ta’kidlashicha, ushbu holat Ma’muriy javobgarlik to‘g‘risidagi kodeksning 41-moddasiga ko‘ra, haqorat qilish, ya’ni shaxsning sha’ni va qadr-qimmatini qasddan kamsitish eng kam ish haqining 20 baravaridan 40 baravarigacha miqdorda jarima solishga sabab bo‘ladi.

Shuningdek, bu vaziyatda ushbu kodeksning “Davlat tili to‘g‘risidagi qonun hujjatlarini buzish” haqidagi 42-moddasi ham qo‘llanilishi mumkin. Unga ko‘ra, fuqarolarning tarbiya va ta’lim berishda tilni erkin tanlashdan iborat huquqlarini buzish, tildan foydalanishda to‘sqinlik qilish va cheklash, davlat tilini, shuningdek O‘zbekistonda yashovchi boshqa millatlar va elatlarning tillarini mensimaslik eng kam ish haqining bir baravaridan ikki baravarigacha miqdorda jarima solishga sabab bo‘ladi.

Bundan tashqari, Ismoil Bahodirov JKning 112-moddasi “O‘ldirish yoki zo‘rlik ishlatish bilan qo‘rqitish” bilan ayblanishi va eng kam oylik ish haqining 25 baravarigacha miqdorda jarima yoki 240 soatgacha majburiy jamoat ishlari yohud bir yilgacha axloq tuzatish ishlari bilan jazolanishi mumkin.

IIBB jabrlanuvchilarning arizasini qabul qilingan. Ertasi kuni esa O‘zLiDeP partiyasidan bo‘lgan Nuriddin Zayniddinov yaqinda majlis o‘tkazilgani, Ismoil Bahodirov partiyadan chetlashtirilgani haqida ma’lum qilgan.

Sank-Peterburgda istiqomat qilayotgan Ismoil Bahodirovning o‘zi esa tushuntirish xati yozib, unda o‘z aybiga iqror ekani, bo‘lib o‘tgan voqeadan pushaymon ekanini aytib, barchadan uzr so‘ragan.

“Biroq ziddiyat huquq-tartibot idoralari doirasida ko‘tarilgan. Ish sudgacha borishi mumkin”,—  deyiladi xabarda.