O‘zbekiston Qozog‘istonga kiyim yetkazib berishda Xitoydan o‘zib ketdi

O‘zbekiston Qozog‘istondagi kiyim-kechak importi bo‘yicha birinchi o‘rinni egalladi. Bu haqda Spot xabar berdi.

2018-yilda qo‘shni mamlakat 512,3 million dollarlik 34,5 ming tonna kiyim-kechak import qildi. Import hajmi 4,9 foizga pasayib, mablag‘ esa 5,5 foizga oshdi.

Kiyim-kechaklarning aksariyat qismi O‘zbekistondan kelgan (10,1 ming tonna, 18,4 million), 2017-yilda Xitoy kiyim yetkazib berish bo‘yicha yetakchilik qilgan edi.

Shu bilan birga, O‘zbekiston kiyimlari Xitoynikiga nisbatan bir necha marotaba arzonroqdir, chunki Xitoy, hajm jihatidan kamroq kiyim yetkazib bergan (8,5 ming tonna) bo‘lsa-da, mablag‘ jihatdan esa 83,5 million dollarni tashkil etdi.

Rossiya yil davomida 6,2 ming tonna (158,2 million dollar), Turkiya — 4,6 ming tonna (98,5 million dollar), Bangladesh — 1,9 ming tonna (42,9 million dollar), Qirg‘iziston — 1 ming tonna (3 million dollar), Eron — 228,7 tonna (133,9 ming dollar) mahsulot yetkazib berdi.