O‘zbekiston Respublikasi Innovatsion rivojlanish vazirligining xodimlari klasterlar, texnoparklar va maxsus iqtisodiy zonalarni yaratish va faoliyatini boshqarish tajribasini o‘rganish maqsadida Rossiya Klasterlar va texnoparklar uyushmasida bir haftalik stajirovka o‘tab keldi. Bu haqda O‘zA xabar bermoqda.
Innovatsion rivojlanish vazirligining Real sektorga innovatsiyalarni joriy qilish va tadqiq etish boshqarmasi bosh mutaxassisi Nurbek Zulqaynarov hamda yetakchi mutaxassis Ilyos Mannopov Rossiya korxonalari infratuzilmalari yuqori darajada ekanini, klaster ishtirokchilari o‘rtasidagi ichki hamkorlik, hududiy va federal hukumat bilan aloqalar ham to‘g‘ri yo‘lga qo‘yilganini qayd etdi. O‘z navbatida, uyushma real sektor va davlat tuzilmalari o‘rtasida ko‘prik vazifasini o‘taydi. O‘zbekistonlik innovatorlarda, ayniqsa, Moskvadagi “Kalibr” texnoparkining yutuqlari katta taassurot qoldirdi.
O‘zbekiston delegatsiyasi, shuningdek, “Texnopolis Moskva” maxsus iqtisodiy zonasiga tashrif buyurib, “Kompoziti bez granits” klasteri faoliyati bilan tanishdi. Bundan tashqari, RF Davlat Dumasi deputati Denis Kravchenko va Rossiya Sanoat-savdo vazirligi xodimlari bilan uchrashuvlar o‘tkazildi. Ular klasterlar, texnoparklar, ochiq iqtisodiy zonalar faoliyatini huquqiy ta’minoti borasida Rossiya hukumatining hamkorligi, davlat tomonidan qay darajada qo‘llab-quvvatlanishi haqida so‘zlab berdi.
Biznes birlashmalarning faoliyatini delegatsiya a’zolari “Texnopark-Lipesk” texnoparki hamda “Lipeskmash” klasteri tajribasida o‘rgangan bo‘lsa, “Sankt-Peterburg” texnoparkining boshqaruv kompaniyasi xodimlari texnopark rezidentlari va bo‘limlarining faoliyati borasida tajribalari bilan o‘rtoqlashdi. Delegatsiyaning bir haftalik safari “Sankt-Peterburg” Klaster rivojlanish markazi va “Sankt-Peterburg” ochiq iqtisodiy zonasiga tashrifi bilan yakunlandi.
Izoh (0)