Россиянинг кластерлар, технопарклар ва махсус иқтисодий зоналар бўйича тажрибаси Ўзбекистонга жорий этилади

Ўзбекистон Республикаси Инновацион ривожланиш вазирлигининг ходимлари кластерлар, технопарклар ва махсус иқтисодий зоналарни яратиш ва фаолиятини бошқариш тажрибасини ўрганиш мақсадида Россия Кластерлар ва технопарклар уюшмасида бир ҳафталик стажировка ўтаб келди. Бу ҳақда ЎзА хабар бермоқда.

Инновацион ривожланиш вазирлигининг Реал секторга инновацияларни жорий қилиш ва тадқиқ этиш бошқармаси бош мутахассиси Нурбек Зулқайнаров ҳамда етакчи мутахассис Илёс Маннопов Россия корхоналари инфратузилмалари юқори даражада эканини, кластер иштирокчилари ўртасидаги ички ҳамкорлик, ҳудудий ва федерал ҳукумат билан алоқалар ҳам тўғри йўлга қўйилганини қайд этди. Ўз навбатида, уюшма реал сектор ва давлат тузилмалари ўртасида кўприк вазифасини ўтайди. Ўзбекистонлик инноваторларда, айниқса, Москвадаги «Калибр» технопаркининг ютуқлари катта таассурот қолдирди.

Ўзбекистон делегацияси, шунингдек, «Технополис Москва» махсус иқтисодий зонасига ташриф буюриб, «Композиты без границ» кластери фаолияти билан танишди. Бундан ташқари, РФ Давлат Думаси депутати Денис Кравченко ва Россия Саноат-савдо вазирлиги ходимлари билан учрашувлар ўтказилди. Улар кластерлар, технопарклар, очиқ иқтисодий зоналар фаолиятини ҳуқуқий таъминоти борасида Россия ҳукуматининг ҳамкорлиги, давлат томонидан қай даражада қўллаб-қувватланиши ҳақида сўзлаб берди.

Бизнес бирлашмаларнинг фаолиятини делегация аъзолари «Технопарк-Липеск» технопарки ҳамда «Липескмаш» кластери тажрибасида ўрганган бўлса, «Санкт-Петербург» технопаркининг бошқарув компанияси ходимлари технопарк резидентлари ва бўлимларининг фаолияти борасида тажрибалари билан ўртоқлашди. Делегациянинг бир ҳафталик сафари «Санкт-Петербург» Кластер ривожланиш маркази ва «Санкт-Петербург» очиқ иқтисодий зонасига ташрифи билан якунланди.​