O‘zbekistonda 2022-yilda aholini ro‘yxatga olish o‘tkaziladi. Bu Prezidentning “O‘zbekiston Respublikasida 2022-yilda aholini ro‘yxatga olishni o‘tkazish konsepsiyasini tasdiqlash to‘g‘risida” farmonida belgilangan.
Farmonda keltirilishicha, mustaqillik yillarida O‘zbekistonda aholini ro‘yxatga olish o‘tkazilmagan. Aholi soniga, yosh-jins tarkibiga keskin ta’sir ko‘rsatgan o‘zgarishlar, respublika hududidagi aholi joylashuvi xususiyatlari va boshqa ijtimoiy-demografik o‘ziga xosliklar aholining joriy hisobiga oid mavjud ma’lumotlarni qo‘llashni sezilarli darajada cheklamoqda.
BMT 2015-yil 10-iyundagi “2020-yilda aholi va uy-joy fondini ro‘yxatga olish borasidagi prinsiplar va tavsiyalar” rezolyutsiyasiga tayanib, a’zo davlatlarni 2020-yilda Butunjahon aholi va uy-joy fondini ro‘yxatga olish dasturi doirasida aholi va uy-joy fondini ro‘yxatga olishga taalluqli xalqaro va hududiy tavsiyalarni inobatga olgan holda kamida bir marta aholi va uy-joy fondini ro‘yxatga olishni o‘tkazishni qat’iy da’vat etadi.
Hujjat bilan O‘zbekistonda 2022-yilda aholini ro‘yxatga olishni o‘tkazish konsepsiyasi;
O‘zbekistonda 2022-yilda aholini ro‘yxatga olishni o‘tkazishga doir kompleks chora-tadbirlar dasturi;
O‘zbekistonda 2022-yilda aholini ro‘yxatga olishni o‘tkazishga ko‘maklashish bo‘yicha respublika komissiyasi tarkibi tasdiqlandi.
Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari huzurida 2022-yilda aholini ro‘yxatga olishni o‘tkazishga ko‘maklashish bo‘yicha hududiy komissiyalar tashkil etilishi belgilandi.
Davlat statistika qo‘mitasi, Iqtisodiyot va sanoat vazirligi, Moliya vazirligi, Ichki ishlar vazirligi, Adliya vazirligi boshqa manfaatdor vazirlik va idoralar bilan birgalikda 2019-yil 1- iyulga qadar “Aholini ro‘yxatga olish to‘g‘risida”gi qonun loyihasini ishlab chiqishi va hukumatga kiritishi topshirildi.
Ma’lumot uchun, O‘zbekistonda oxirgi bor aholini ro‘yxatga olish 1989-yilda o‘tkazilgan.
Eslatib o‘tamiz, oldnroq Davlat statistika qo‘mitasi mamlakat aholisini 2020-yilda ro‘yxatga olishni rejalashtirayotganini bildirgandi.
Izoh (0)