Jizzax viloyatiga Janubiy Koreyaning Dongil Construction kompaniyasi ta’sischisi Ko Dje Il hamda kompaniya Ostona shahri filiali direktori Kim Sang Baye keldi. Bu haqda O‘zA xabar berdi.
Viloyat hokimi Ergash Soliyev va soha rahbarlari bilan bo‘lgan uchrashuvda Ko Dje Il Dongil Construction kompaniyasi faoliyati bilan tanishtirib, bu qurilish birlashmasi jamoasi tomonidan Qozog‘istonning Ostona hamda Olmaota shaharlarida 5 mingta yangi kvartira qurilgani, yaqin kunlarda yana 3 mingta kvartira foydalanishga topshirilishi haqida ma’lumot berdi.
U kompaniya mablag‘lari hisobidan ko‘p qavatli uylar kompleksini qurish, davlat investitsiya dasturi doirasida byudjet mablag‘lari hisobiga ijtimoiy obyektlarini barpo etish taklifini bildirdi.
O‘z navbatida, viloyat xokimligi tomonidan koreyalik investorlarga “Zamonaviy va aqlli” tijorat ko‘p qavatli uylar kompleksini qurish hamda qiymati 10 milliard so‘mlik “Bolalar qo‘g‘irchoq teatri” loyihasini amalga oshirish taklif etildi.
Uchrashuvda tomonlar Jizzax shahrining bosh rejasini hamkorlikda ishlab chiqish va hududda zamonaviy tijorat ko‘p qavatli uylar hamda ijtimoiy obyektlar qurilishi uchun yer maydonlari ajratish bo‘yicha amalga oshiriladigan ishlar kelishib oldi.
Izoh (0)