2018-yilda Buxoro viloyati hududidan Navoiy viloyati tasarrufiga o‘tkazilgan “Zafarobod” shaharchasida Navoiy viloyati ichki ishlar boshqarmasi tomonidan ilk marotaba Profilaktika kunlari tashkil etildi. Bu haqda Navoiy viloyati IIB matbuot xizmati xabar berdi.
Tadbirlar davomida aholining turmush tarzi, hududdagi krimenogen vaziyat, fuqarolarning yong‘in xavfsizligi hamda yo‘l qoidalariga amal qilish holati o‘rganildi. O‘rganish ishlari 6 guruhga bo‘lingan holatda olib borildi.
“Bugungi kunda Zafarobodda 5649 nafar aholi va 1603 ta xonadon mavjud. Uyma-uy yurganda xonadonlardan og‘ir sharoitdagi, kelgusida muammo kelib chiqishi mumkin bo‘lgan 687 tasi alohida o‘rganilib, oila vakillari bilan yakka suhbatlar tashkil etildi, — deydi viloyat IIB matbuot xizmati rahbari O‘ktam Usmonov. — Kelgusida ular bilan tizimli ishlash maqsadida kam ta’minlangan va muammoli oilalarning ro‘yxati shakllantirilmoqda”.
Aholi yashash uylarini o‘rganish jarayonida 45 ta holatda yong‘in xavfsizligi talablari buzilgani aniqlangan. Nosoz dudburonlardan foydalanish, nostandart shlang bilan gaz tarmog‘iga ulanish hamda tabiiy gazdan qo‘lbola usulda tayyorlangan gaz so‘rgichlardan foydalanish shular jumlasidan. Tadbirlar yakunida viloyat IIB tomonidan kam ta’minlangan oilalarga gaz plitalari, bir tirkama o‘tin va moddiy yordam ko‘rsatildi.
Izoh (0)