Komil Allamjonovdan heshteg. Yerga yetib kela olmagan asteroid. Ijtimoiy tarmoqdagi trendlar

Internetda nima gap, Facebook, Twitter, Telegram’chilar hafta so‘ngida qanday mavzularni muhokama qildi? Bu haqda navbatdagi dayjestimizda o‘qing.

Komil Allamjonovning internet ahli bilan muloqoti

Hafta so‘ngidagi asosiy masala Komil Allamjonovning posti bo‘ldi. Toshkent shahar hokimi Jahongir Ortiqxo‘jayev “Gazeta.uz”ga bergan intervyusidan so‘ng O‘zbekiston matbuot va axborot agentligi rahbari Komil Allamjonov o‘z Facebook-sahifasida unga bildirilayotgan tanqidlarga munosabat bildirdi va uni #hasadgiybatigvoboshgabalo heshtegi bilan begiladi.

KOMIL ALLAMJONOV

Ortiqxo‘jayev haqida o‘qiyapman. Hokim bo‘lganigayam pushaymon qilib yuborishdi. Oson emas rahbar bo‘lish. Tashqaridan, ayniqsa anonim akkaunt orqali yomonlash eng osoni. Hokim mayli, o‘zingchi o‘zing, nimani qotirib qo‘yding? Hamma dono. Insof bersin hammamizga! #hasadgiybatigvoboshgabalo

Bu post tagida Facebook’dagi deyarli barcha mashhur blogerlar ta’na-dashnomlarini yozib tashladi. Izohlarni va ularga bosiqlik bilan javob berayotgan O‘zMAA rahbarlarining fikrlarini o‘qib, ijtimoiy tarmoqda sog‘lom bahs-munozara maydoni hosil bo‘lganini ko‘rib xursand bo‘ldik. Muhimi, har kim o‘z fikrini bildirmoqda.

Facebook foydalanuvchilaridan biri qo‘ygan posti ikki tomonning farqini ko‘rsatadi. Nima ham derdik, hammaning o‘z xohish-istak, orzusi bor; kimdir Shimoliy muz okeaninini orzu qilsa, kimdir ehromlarni ko‘rgisi keladi…

* * *

Guli Ra

Turli standartlar

Bor-yo‘g‘i 18 kun O‘rta Osiyoda sayohat qilish uchun ikki kishiga 13 000 dollar to‘layotgan turistni ko‘rib hayotdan xafa bo‘lib ketdim. Men bu pulni topish uchun deyarli bir yil mehnat qilishim kerak. Shunda ham topganimni bir tiyin ham sarflamasdan yig‘samgina to‘play olarkanman.

O‘zbek 13 000 dollarga nimalar qilgan bo‘lardi?

1. Misoldagi o‘zbegimizning o‘z uyi bo‘lmasa, biror tumandan yoki shahar (Toshkent emas) chetrog‘idan uy olardi.

2. Farzandi Diplomatiya universitetida o‘qisa, kontraktining to‘rt yilini ham to‘lab, qolgan 10–15 millionga yana mol-qo‘y boqib, foyda ham ko‘rardi.

3. Bo‘yi yetgan qizini egasiga topshirib yuboray deb hamma pulni sarpoga sarflab, buning ustiga qarz ham olardi.

Nega o‘zbek 18 kunga shuncha pul sarflay olmaydi, bilasizmi? Uy olishga, to‘yga sochishga yoki befoyda, lekin qo‘shnilar nazdida obro‘li ta’limga sarflagani uchun bo‘lsa kerak.

Boshqa tomondan, o‘zbek chiroyli avtoraqam yoki GM’ning o‘rtacha mashinasini sotib olishga bundan ancha ko‘p sarflay oladi. Obro‘ni qarang.

Yumoristik suratlardan biri: diskni har safar ishlatgach yana joyiga tikib qo‘yish yoddan chiqmasin.

Muhammad Temur A’zam

innovatsion yechim.

Asteroid — kelishimni kutganlaram ko‘p

10–15 kundan buyon kimdir hazillashib yoki uyqusirab va yoki kayf holatda tarqatvorgan 1-feval kuni Yerga ulkan asteroid urilib, olam tugaydi, degan xabari o‘zbekistonlik internet foydalanuvchilari orasida qo‘lma-qo‘l bo‘lib bearmon tarqadi. Ayniqsa Telegram’da. Ba’zi birovlar bunga ishongan bo‘lsa-da, ko‘pchilik, albatta, bundan hajv uchun foydalandi. Xususan, 1-fevral kuni odamlar bir-birlariga hazil postlar qo‘yib ulashdi. Kelmagan “mehmon” haqidagi postlardan keltiramiz:

Telegram’dagi @uztwit kanali:

Hurmatli Yer sayyorasi ahli, boshqa sayyorada soqqali ishim chiqib qolgani uchun 1-fevral kuni sizlarda mehmon bo‘lmaydigan bo‘ldim, biror milliard yillarda qarib qolmasam qaytarman. Sizlarga tinchlik va xotirjamlik tilab hurmat ila asteroid.

Shaydoi Jannat

Bir tanishim 1-fevral kuni oxirzamon bo‘ladi deb, yanvarning boshidan boshliqlarini haqorat qilib, ichidagi alamlarni chiqarib ishdan ketibdi; bankdan kredit olib, pullarga mazza qilib yeb-ichib, hayotni gashtini suribdi; hazil-huzul qilib, mashinani o‘qday haydab, shahar trassalari kameralariga 21 marta tushibdi...

“Oxirzamon”ni “otmen” qilishganini bilgach, ancha-muncha xafa bo‘ldi.

Xullas, shunaqa gaplar )))

Navbatdagi post doimiy tanqid markazida turuvchi “pasport stol”lardagi ijobiy o‘zgarishlar haqida

Bekzod Ibragimov

O‘sish bor, o‘zgarish bor

Bugun vaqtinchalik propiskamning vaqtini uzaytirish uchun IIBga bordim. Hech qanday ortiqcha hujjatlarsiz, ovoragarchiliksiz yarim soatga qolmasdan hal qilib berishdi. Hatto ijara shartnomasini ham so‘ramadi. Yana avvalgidek olti oy emas, bir yil muddatga uzaytirishdi. Toshkentda qariyb yetti yildan beri yashab, o‘n martadan ko‘p vaqtincha ro‘yxatga qo‘yish uchun murojaat etgan bo‘lsam, birinchi marta shunchalik tez bitishi. Bo‘larkanku odamlarni 10–15 kunlab sarson qilmasa...

O‘ylaymanki, yaqin orada bu qog‘ozbozlik ham barham topadi. Mamlakatimiz poytaxtida ham xuddi o‘z uyimizda yurganday, bemalol yashay boshlaymiz. Uy olish, tadbirkorlik qilish va boshqa-boshqa huquqlarimizga qo‘yilgan cheklovlar bekor bo‘ladi. Vaqtinchalik propiskani boshqa uzaytirishga hojat qolmaydi, deb umid qilib qolaman!!!

 

Mubashshir Ahmad

Ayollardan biri aytadi: Facebook’da erim o‘zini shu darajada ideal tutadiki, yozganlarini o‘qib, gohida uning xotini bo‘lgim kelib ketadi.

Davrani kengroq oling, Twitter’chilarga navbat:

Сан куй гушти ейсанми?
Йук.
Мол гуштичи?
Йук.
Баликчи?
Йук.
Вегетарианмисан?
Йук, камбагалман.

— mamurjon (@mamriniio) January 31, 2019

Twitter olamida mashhur qiziqchi o‘z sahifasini yurgizib (feyk emas, degan umiddamiz), o‘zining hazillarini qo‘yib bormoqda. Ulardan birini keltirmoqdamiz. Demak, Avaz Oxundan hazil tvit:

https://twitter.com/Avaz_Oxun/status/1091010202256723968

Bugungi dayjestimizni Madina Nurman Telegram-kanalidagi mulohazaga tortuvchi post bilan yakunlaymiz:

Jamiyatimizning bor mantig‘i.

Boy odamni yuqori mansabga qo‘yishdi:

- Lobbist! Xalq o‘g‘risi!

Oddiy odamni yuqori mansabga qo‘yishdi:

- Bo‘lajak korrupsioner!

Qandaydir qonun chiqdi:

- Tili yo‘qmi? Tushuntirsin!

Tushuntiryapti:

- Mahmadona! O‘zini oqlayapti!

Mansabdan ketdi:

- Ana! Aytmaganmidim, aybi bor!

OAVda ko‘rinmay qoldi:

- “O‘tiribdida”.

OAVda ko‘rinib qoldi:

- Nimadir borda bu yerda, bekorga qaytmagan.

Ijtimoiy hayot ummonidagi hodisalarni “Daryo”da kuzatishda davom eting.