Qaroqchilar Benin qirg‘oqlarida o‘g‘irlab ketilgan rossiyaliklarni qo‘yib yubordi

Qaroqchilar tomonidan Benin qirg‘oqlari yaqinidagi Gvineya bo‘g‘ozida o‘g‘irlab ketilgan barcha olti nafar rossiyalik qo‘yib yuborildi. Bu haqda Rossiyaning Nigeriyadagi elchixonasiga tayanib, “RIA Novosti” xabar berdi.

Diplomatik vakolatxona tomonidan ma’lum qilishicha, ayni paytda dengizchilarni yaqin vaqt ichida o‘z vataniga qaytarish masalasi hal qilinmoqda.

17-yanvar kuni dengizchilar uchun pul talab qilingani haqida xabar berilgan, biroq uning summasi aytilmagan. Pulning to‘langan-to‘lanmaganligi noma’lum.

Rossiya fuqarolarining o‘g‘irlab ketilgani haqida 5-yanvarda ma’lum bo‘lgan. MSC Mandy konteyner kemasiga hujum 2-yanvar kechasi uyushtirilgan.

Kemaning bortida 20 nafardan ortiq kishi bo‘lgan. Hujum qilganlar 7—9 kishi bo‘lgan. Ular o‘qotar va sovuq qurollar bilan tahdid qilgan.