Samarqandda alimentdan qarzdorligi 55 million so‘mga yetgan ota 15 sutkaga qamaldi

Fuqarolik ishlari bo‘yicha Kattaqo‘rg‘on tumanlararo sudining 2010-yil 13-yanvardagi sud buyrug‘iga asosan Sh.N. ikki nafar farzandining moddiy ta’minoti uchun F.S. foydasiga aliment undirish belgilangan edi. Biroq Sh.N. ijro hujjati chiqqan kundan buyon aliment pullarini to‘lamaganligi oqibatida 2019-yil 21-yanvar holatiga ko‘ra 55 105 296 so‘m qarzdorlik kelib chiqqan.

Majburiy ijro byurosi Paxtachi tuman bo‘limi davlat ijrochisi S.Isakovning “Daryo” muxbiri Farhod Norbo‘tayevga ma’lum qilishicha, tuman Ma’muriy sudining 21-yanvar kungi qarori asosida Mamuriy javobgarlik to‘g‘risidagi Kodeksning 47/4-moddasiga asosan Sh.N.ga 15 sutka qamoq jazosi tayinlangan.