Moskva sudida O‘zbekiston va Qirg‘izistonning IShIDga a’zo bo‘lgan 11 nafar fuqarosiga hukm o‘qildi

23-yanvar kuni Moskva okrugi harbiy sudi uch nafar O‘zbekiston fuqarosi va 8 nafar Qirg‘iziston fuqarosini Rossiya federatsiyasi jinoyat kodeksining 205-moddasida ko‘zda tutilgan jinoyatni sodir etganlikda aybdor deb topdi, deb xabar beradi “Anhor.uz”.

Qayd etilishicha, Qirg‘iziston fuqarolari M.Vohidov, D.Vohidov, I.Rasulillayev, T.Mirzajonov, Sh. Umarov, U.Faxriddin, R. To‘raqulov, Sh.Esenbayev, O‘zbekiston fuqarolari B. Mahmudov, F. Qodirov, Sh. Isroiljonovlar IShID terrorchilik guruhiga qo‘shilib, Moskva va Sankt-Peterburgda qo‘lbola portlash moslamalari va o‘qotar qurollardan foydalanib, terakt sodir etishni rejalashtirgan.

Ayblanuvchilarga nisbatan olti yildan 18 yilgacha ozodlikdan mahrum etish jazosi tayinlandi. Ular jazoni qat’iy tartibli koloniyalarda o‘taydi.

IShID ekstremistik guruhi jahonning bir qator mamlakatlari va xalqaro tashkilotlar tomonidan “terrorchilik tashkiloti” deb topilgan.