18-yanvar, juma kuni Andijon viloyati prokuraturasi va Davlat soliq boshqarmasi hamkorligida soliq qonunchiligi buzilishining oldini olish maqsadida “Kuyganyor dehqon bozori”da o‘tkazilgan nazorat va monitoring tadbiri davomida 175 ta qoidabuzarlik aniqlangan. Bu haqda jurnalist Umidjon Mamarasulov xabar bermoqda.
Viloyat Davlat soliq boshqarmasi Jamoatchilik bilan aloqalar va huquqiy axborot sho‘basining ma’lum qilishicha, bozorda faoliyat olib borayotgan tadbirkorlar tomonidan 41 holatda xaridorga chek bermaslik, 25 holatda to‘lov terminallaridan foydalanmaslik, 22 holatda hujjatsiz faoliyat yuritish, 87 holatda yollanma ishchini rasmiylashtirmaslik hamda ijara shartnomasini tuzmaslik kabi qoidabuzarliklar sodir etilgan.
Jumladan, tadbirkorlardan biri bozordagi 336-do‘konda ijara shartnomasiz, kassa apparati nosoz bo‘lishiga qaramay savdo qilayotgani aniqlangan. Shuningdek, uch kishini yollanma ishchi sifatida ro‘yxatdan o‘tkazmasdan ishlatmoqda. Bozorning eng gavjum nuqtasida joylashgan 372-do‘kon egasi ham uch nafar ishchisiga “konvert” usulida maosh berib kelayotganligi ma’lum bo‘ldi.
Mazkur holat yuzasidan soliq xodimlari tomonidan tushuntirish ishlari olib borildi. Tadbirkorlar shu yerning o‘zida tashkil etilgan Davlat xizmatlar markazining sayyor shtabida yollanma ishchilarini ro‘yxatdan o‘tkazishdi.
Tadbir davomida ko‘p daromad topib, kam soliq to‘lashni ko‘zlab, guvohnomasida qayd etilgan faoliyat turi bilan shug‘ullanmayotganlar ham topildi. Shu yerning o‘zida ularning faoliyat turlari moslashtirildi.
Bozordagi 96 ta tadbirkorlik subyektida xronometraj tadbiri o‘tkazilib, savdo tushumi o‘tgan haftaning mos kunlariga nisbatan 2,5 barobar yoki 149 million 258 ming so‘mga oshirilishiga erishildi.
Tadbir chog‘ida mutaxassislar qulay biznes uchun keng sharoitlar yaratilayotganini, bu ayniqsa, 2019-yil soliq to‘lovlarida aks etganini ta’kidladi. Jumladan, yillik tovar aylanmasi 100 million so‘mdan oshgan, biroq 1 milliard so‘mdan oshmagan yakka tartibdagi tadbirkorlar yagona soliq to‘lovini 4 foiz stavkada to‘lashga o‘tkazilganligi, 100 million so‘mdan oshmaganlar uchun qat’iy belgilangan soliq saqlab qolinganligiga ham to‘xtalib o‘tildi.
Izoh (0)