Андижондаги деҳқон бозорида савдо тушуми бўйича ўтказилган назорат тадбирида 175 та қоидабузарлик аниқланди

18 январь, жума куни Андижон вилояти прокуратураси ва Давлат солиқ бошқармаси ҳамкорлигида солиқ қонунчилиги бузилишининг олдини олиш мақсадида «Куйганёр деҳқон бозори»да ўтказилган назорат ва мониторинг тадбири давомида 175 та қоидабузарлик аниқланган. Бу ҳақда журналист Умиджон Мамарасулов хабар бермоқда.

Вилоят Давлат солиқ бошқармаси Жамоатчилик билан алоқалар ва ҳуқуқий ахборот шўъбасининг маълум қилишича, бозорда фаолият олиб бораётган тадбиркорлар томонидан 41 ҳолатда харидорга чек бермаслик, 25 ҳолатда тўлов терминалларидан фойдаланмаслик, 22 ҳолатда ҳужжатсиз фаолият юритиш, 87 ҳолатда ёлланма ишчини расмийлаштирмаслик ҳамда ижара шартномасини тузмаслик каби қоидабузарликлар содир этилган.

Жумладан, тадбиркорлардан бири бозордаги 336-дўконда ижара шартномасиз, касса аппарати носоз бўлишига қарамай савдо қилаётгани аниқланган. Шунингдек, уч кишини ёлланма ишчи сифатида рўйхатдан ўтказмасдан ишлатмоқда. Бозорнинг энг гавжум нуқтасида жойлашган 372-дўкон эгаси ҳам уч нафар ишчисига «конверт» усулида маош бериб келаётганлиги маълум бўлди.

Мазкур ҳолат юзасидан солиқ ходимлари томонидан тушунтириш ишлари олиб борилди. Тадбиркорлар шу ернинг ўзида ташкил этилган Давлат хизматлар марказининг сайёр штабида ёлланма ишчиларини рўйхатдан ўтказишди.

Тадбир давомида кўп даромад топиб, кам солиқ тўлашни кўзлаб, гувоҳномасида қайд этилган фаолият тури билан шуғулланмаётганлар ҳам топилди. Шу ернинг ўзида уларнинг фаолият турлари мослаштирилди.

Бозордаги 96 та тадбиркорлик субъектида хронометраж тадбири ўтказилиб, савдо тушуми ўтган ҳафтанинг мос кунларига нисбатан 2,5 баробар ёки 149 миллион 258 минг сўмга оширилишига эришилди.

Тадбир чоғида мутахассислар қулай бизнес учун кенг шароитлар яратилаётганини, бу айниқса, 2019 йил солиқ тўловларида акс этганини таъкидлади. Жумладан, йиллик товар айланмаси 100 миллион сўмдан ошган, бироқ 1 миллиард сўмдан ошмаган якка тартибдаги тадбиркорлар ягона солиқ тўловини 4 фоиз ставкада тўлашга ўтказилганлиги, 100 миллион сўмдан ошмаганлар учун қатъий белгиланган солиқ сақлаб қолинганлигига ҳам тўхталиб ўтилди.