Andijon tumanida “Xavfsiz shahar” loyihasi doirasida mavjud ko‘chalarning kirish-chiqish joylariga, kollej, maktab, maktabgacha ta’lim muassasalari va boshqa ijtimoiy obyektlarga kuzatuv kameralarini o‘rnatish ishlari yakuniga yetish arafasida. Bu haqda jurnalist Umidjon Mamarasulov xabar bermoqda.
Viloyat ichki ishlar boshqarmasi matbuot xizmatining ma’lum qilishicha, hokimliklar hamda davlat va jamoat tashkilotlari hamkorligida hududlarda aholi xavfsizligini ta’minlash, huquqbuzarlik va jinoyatlarning oldini olishga alohida e’tibor qaratilmoqda. “Xavfsiz shahar” loyihasi doirasida turar-joylar, turli bino va inshootlar muhofazasini ta’minlashda texnik qo‘riqlash punktining afzalliklari yuqoriligini inobatga olib, joylarda kuzatuv kameralari o‘rnatish ishlari yanada jadallashmoqda. Shu kunga qadar viloyat miqyosida 60 foizdan ortiq hududga kameralar o‘rnatib bo‘lingan.
Andijon tumani ichki ishlar bo‘limi boshlig‘ining birinchi o‘rinbosari, mayor Jasur Hudoyberdiyevning aytishicha, shu kunga qadar tumandagi 329 ta ko‘chaning 200 tadan ortig‘i kameralar kuzatuvida. Natijada ushbu ko‘chalarda yuz berishi mumkin bo‘lgan turli jinoyat va baxtsiz xodisalarning oldi olingan, huquqbuzarliklar soni keskin kamaygan. Shuningdek, yakka yolg‘iz fuqarolar, janjalkash va notinch oilalar, muqaddam sudlangan va jazoni o‘tash muassasalaridan ozod etilgan shaxslarni doimiy nazorat qilish yo‘lga qo‘yilgan. Masalan, joriy yil yanvar oyining shu kuniga qadar hech qanday jinoyat yoki huquqbuzarliklarni sodir etish kuzatilmagan. 2018-yilning yanvarida bu ko‘rsatkich 15 tani tashkil etgandi.
– Hoqon qishlog‘i misolida oladigan bo‘lsak, — deydi mayor Jasurbek Hudoyberdiyev. – Hududda 19 mahalla, 107 ta ko‘cha mavjud bo‘lib, o‘ttiz mingdan ortiq aholi yashaydi. Aholi xavfsizligini ta’minlash, jinoyatlarning oldini olish, turar joylar, turli bino va inshootlarni muhofaza qilish maqsadida 72 ta ko‘chaning kirish-chiqish joylariga kuzatuv kameralari o‘rnatilgan. Baxtsiz hodisalar kuzatilmagan. Davlatimiz rahbarining 10-yanvardagi topshirig‘iga asosan yanvar oyiga qadar barcha ko‘chada shunday texnik qo‘riqlash tizimlari yo‘lga qo‘yiladi. Barcha kameralar onlayn tarzda profilaktika inspektorining xizmat xonasiga ulangan. Bu aniq vaqt tartibida butun mahallani kecha-yu kunduz kuzatish imkonini bermoqda.
Viloyat IIBdan olingan ma’lumotga ko‘ra, turli baxtsiz hodisalar va jinoyatlar kuzatuv kameralari yordamida tezkorlik bilan fosh etilgan, aksariyatining oldi olingan.
Izoh (0)