Андижон туманида «Хавфсиз шаҳар» лойиҳаси доирасида мавжуд кўчаларнинг кириш-чиқиш жойларига, коллеж, мактаб, мактабгача таълим муассасалари ва бошқа ижтимоий объектларга кузатув камераларини ўрнатиш ишлари якунига етиш арафасида. Бу ҳақда журналист Умиджон Мамарасулов хабар бермоқда.
Вилоят ички ишлар бошқармаси матбуот хизматининг маълум қилишича, ҳокимликлар ҳамда давлат ва жамоат ташкилотлари ҳамкорлигида ҳудудларда аҳоли хавфсизлигини таъминлаш, ҳуқуқбузарлик ва жиноятларнинг олдини олишга алоҳида эътибор қаратилмоқда. «Хавфсиз шаҳар» лойиҳаси доирасида турар-жойлар, турли бино ва иншоотлар муҳофазасини таъминлашда техник қўриқлаш пунктининг афзалликлари юқорилигини инобатга олиб, жойларда кузатув камералари ўрнатиш ишлари янада жадаллашмоқда. Шу кунга қадар вилоят миқёсида 60 фоиздан ортиқ ҳудудга камералар ўрнатиб бўлинган.
Андижон тумани ички ишлар бўлими бошлиғининг биринчи ўринбосари, майор Жасур Ҳудойбердиевнинг айтишича, шу кунга қадар тумандаги 329 та кўчанинг 200 тадан ортиғи камералар кузатувида. Натижада ушбу кўчаларда юз бериши мумкин бўлган турли жиноят ва бахтсиз ходисаларнинг олди олинган, ҳуқуқбузарликлар сони кескин камайган. Шунингдек, якка ёлғиз фуқаролар, жанжалкаш ва нотинч оилалар, муқаддам судланган ва жазони ўташ муассасаларидан озод этилган шахсларни доимий назорат қилиш йўлга қўйилган. Масалан, жорий йил январь ойининг шу кунига қадар ҳеч қандай жиноят ёки ҳуқуқбузарликларни содир этиш кузатилмаган. 2018 йилнинг январида бу кўрсаткич 15 тани ташкил этганди.
– Ҳоқон қишлоғи мисолида оладиган бўлсак, — дейди майор Жасурбек Ҳудойбердиев. – Ҳудудда 19 маҳалла, 107 та кўча мавжуд бўлиб, ўттиз мингдан ортиқ аҳоли яшайди. Аҳоли хавфсизлигини таъминлаш, жиноятларнинг олдини олиш, турар жойлар, турли бино ва иншоотларни муҳофаза қилиш мақсадида 72 та кўчанинг кириш-чиқиш жойларига кузатув камералари ўрнатилган. Бахтсиз ҳодисалар кузатилмаган. Давлатимиз раҳбарининг 10 январдаги топшириғига асосан январь ойига қадар барча кўчада шундай техник қўриқлаш тизимлари йўлга қўйилади. Барча камералар онлайн тарзда профилактика инспекторининг хизмат хонасига уланган. Бу аниқ вақт тартибида бутун маҳаллани кеча-ю кундуз кузатиш имконини бермоқда.
Вилоят ИИБдан олинган маълумотга кўра, турли бахтсиз ҳодисалар ва жиноятлар кузатув камералари ёрдамида тезкорлик билан фош этилган, аксариятининг олди олинган.
Изоҳ (0)